胡諾言望女成材怕淪娛圈花瓶
廿四孝老竇胡諾言近期忙於拍劇，但愛女胡芷苓剛滿兩歲要入讀幼兒班，胡諾言盡可能抽空接送愛女返學。雖然芷苓遺傳他的表演天分，但他期望女兒讀好書，不想女兒日後入娛圈只做花瓶。
近期忙拍劇集《造王者》的胡諾言，日前抽空與太太陳琪到九龍塘某學校接女兒放學，芷苓似乎對學校的陌生環境相當適應，放學時見她蹦蹦跳，還拖着父母手盪韆鞦，非常可愛。胡諾言說：「佢返學，做父母嘅都緊張o架，因為要同咁多同學仔相處。不過佢都算聰明伶俐，又有禮貌，老師都好錫佢。返學以嚟都冇喊冇扭計，佢都鍾意返學。」
幾乎日日影相
看着女兒返學，身為父親的胡諾言別有一番感受。他說：「好鍾意同個女影相、拍片，幾乎每日都影，睇住佢長大覺得佢每日都成長緊，樣貌都不斷變化。」芷苓活潑可愛逗人歡心，故獲得奶粉、童裝、健康食品等贊助。問胡諾言想不想女兒當童星？他說：「咁又冇諗過，細個玩吓就可以，大個就唔好喇，都係畀心機讀書啦，做呢行好講際遇！佢依家人見人愛啫，將來都唔知係咪咁標青呢！做幕前我又唔想佢只做花瓶，希望佢做個有內涵嘅人，都係讀好書先啦！」
向黎耀祥偷師
另外，胡諾言與視帝黎耀祥在《造》劇有不少對手戲，他說：「如以對手戲嚟講今次都係第一次合作，祥仔唔使講係好好嘅演員，壓力就冇，希望喺佢身上偷到師啦，佢無論事業家庭都兼顧得咁好。」
文：影視組