花身騷
今個夏日時裝界一片色彩斑斕，恍如萬花筒般的Pattern叫人看得目不暇給。Pattern服飾可謂是歷久不衰的Item，多變易襯，難怪深受一眾女星Model熱捧。不過要切記絕不能貪心周身「花」，否則只會令人眼花繚亂。
薛凱琪則以一雙修長美腿為Pattern Leggings作最佳示範。樂壇天后容祖兒以高挑身形演繹Pattern One-Piece，就散發一身清爽感覺，型格與女人味兼備。
薛凱琪配搭滿分
「幾得意，雖然Pattern古怪但個顏色好襯，成個Look以黑白為主，符合着衫唔好多過三種顏色嘅原則！撞得唔錯，又Rock又青春。Pattern Leggings好易顯得對腳肥短，但佢對腳夠瘦夠修長就完全冇問題。」
佘詩曼縮短比例
「條裙幾型幾Rock，可惜對Leggings同對鞋襯錯咗，對鞋令到對腳顯得短咗，比例唔靚，換對Leggings黑色會好啲。條裙已經係重點，唔需要咁多花巧嘢，簡簡單單已經好靚。」
周慧敏穩穩陣陣
「佢一向係穩陣派，簡單唔會太花巧，條裙嘅藍色孔雀羽毛Pattern好靚。」
趙哲妤老氣橫秋
「條裙唔靚，佢身形比例ＯＫ，將套衫演繹得好好，可惜條裙本身太老積，過年着會適合啲。」
Alice B.過熟嘥料
「過分成熟，浪費咗佢嘅氣質，對黑色高踭鞋好怪，同條裙唔襯，換對紫色高踭鞋會靚好多。」
楊梓瑤鄰家肉女
「胸太大有時着衫唔係咁靚，會顯得好肉感。套衫好有夏天同青春氣息，但就唔特別，普通鄰家女孩打扮。」
傅穎中年公主
「有啲老氣，想扮公主Look但太刻意去配襯，冇乜時尚觸覺，唔需要襯得咁絕。將啲頭髮紮起晒顯得老咗，放番落嚟會靚啲。」
容祖兒大方舒服
「大方得體，好靚，Pattern One-Piece襯埋今年好Hit嘅Platform鞋，配襯得好出色，感覺清爽舒服。條裙中間有開衩帶點Sexy，好Trendy又好Feminine。」
陳嘉容Profile
陳嘉容，香港著名模特兒，曾為各大國際品牌行時裝騷。在時裝界打滾多年，不論在時裝方面的理論還是實踐，都難不到她。近年更為電視時裝節目擔任主持，化身Stylist教人配襯衣着打扮。