杜如風爛命一條
講起杜如風（Helen），令人聯想起「癲喪」兩字，皆因這個自認爛命一條的傻大姐，經常口沒遮攔，行為舉止更加令人意想不到，但她偏偏識得投胎，還人緣甚佳，就連惡搞分子何超儀與謝霆鋒都對她愛錫有加，再無厘頭「亂噏廿四」都冇有怕，果然人如其名，絕無改錯名——如「瘋」！
我天生就係購物狂，不過小學時冇錢買衫，到中學先有第一張信用卡，最終當然係碌爆卡，爹哋媽咪真係後悔至今！不過我媽咪係理財高手，我碌爆卡次數已經多到不能盡錄，佢惟有將我信用額愈set愈低，等我有卡都碌唔到，不過我都要借機會同媽咪講一聲「多謝你」，如果唔係多得你呢個英明決定，我諗早已破產，仲要破完再破！
自嘲垃圾婆
話我係「大花筒」，認真抬舉我，因為我仲未夠班做大花筒，距離仲好遠，我仲未去到亂咁買，哈……其實我好認同物以類聚呢句說話，因為我身邊朋友都係有鋪shopping癮，好多仲係某某品牌VIP，甚至有折。
我從來唔掉衫，因為覺得潮流係一個循環，遲早都會興番，搞到我好似垃圾婆，愈放愈多，多到可以壓得死我，如果我父母係億萬富翁，又有豪宅住，邊有咁多問題？起碼阿媽每次見我買衫就唔會「剷」到我飛起，仲話我唔買衫就可以買樓，其實我依家有樓住，做乜要買樓，我真係衰到爆炸！
屎唔臭都食
我唔係無厘頭，係性格大無畏，認真爛命一條，我乜都敢死，可以話屎唔臭都食，慘得過我又人緣好，死好命多人錫。其實，識得我個人都覺得我easy going，性格樂觀好似開心果，朋友中我係擔任娛樂組組長一職，仲係歡樂小姐，所以超儀當我係女、霆鋒當我阿妹。
我同超儀、霆鋒識咗好耐，我喺日本讀完書返港就喺英皇電影公司做助導，可能大家臭味相投，好快就friend埋一堆；而「哎吔阿哥」霆鋒仲有個朵-「pose man」，班friend都習慣佢經常擺甫士，最犀利連打機都有甫士，佢唔係特登，根本係天生咁狀態。
其實霆鋒結婚，做埋老竇後，我哋都好少見，雖然佢依家做咗新聞人物，但霆鋒同栢芝都好錫我，作為「哎吔阿妹」嘅我亦唔方便過問佢哋家事，當然我唔想佢哋離婚，既然緣盡都冇辦法，現階段最重要係以一對小朋友着想，總之一切盡在不言中。
入選性幻想對象
杜如風雖然是「洗衫板」身材，但竟然不愁「市場」，更入選為「性幻想」對象之一，服未？
有人話我知，我竟然入選「性幻想」對象之一，估唔到我咁洗衫板嘅身材都有市場，哈……我有冇拍拖？話冇你都唔信，不過唔係好穩定囉！點解？因為我成日都四圍飛，一去就冇回頭，起碼一年半載先再見，試問邊有男人頂得我順？不過我冇預自己嫁唔出，但都會留後路畀自己，就係同定爹哋媽咪講，留番廚房個灶罅，萬一我嫁唔出，都有地方住。總之，我呢種人要自己養自己，係靠唔到人，感情事一切隨緣，反正佢哋都冇催婚，我爹哋錫我錫到燶，邊捨得我畀人搶走呀！
難有退休一日
「大花筒」的杜如風，自認難有退休一日，不過就希望搵夠「老竇本」，報答老父的養育之恩。
如果問我有冇諗過將來？我表面答你——退休。所謂「讀萬卷書不如行萬里路」，儘管退休都會繼續環遊世界，唔使化妝、唔使出鏡，繼續喪shopping，幾爽！不過，發夢冇咁早，以我呢鋪shopping癮，咁使錢，幾難有退休呢一日，除非我中六合彩億元獎金啦！其實，真心話係想儲夠老竇本，佢前半生為我仆心仆命，我都想佢晚年有好日子，不過衰女講句——等下啦！我仲未買夠、玩夠！
口述：杜如風
筆錄：劉慰思
攝影：沈健程
服裝：Rick Owens