彭羚湊女返學見牙唔見眼

不少明星子女入讀名校，雖然家長們身為歌手名人，但亦會親自接送子女，彭羚及林海峰幼女林清、陳奕迅女兒陳康堤同入讀位於佐敦的著名女校，今年齊齊升讀小二。昨日為該校小一至小三年級學生的開學日，彭羚於上午七時許便與囡囡乘白色七人車到達，兩母女手拖手邊行邊傾，場面溫馨。

囡囡自己背書包

身穿全黑服飾的彭羚雖戴上黑超，但仍表現親切，全程笑容滿面，囡囡林清雖然年紀小小，不過亦十分獨立，自己背上書包，不用媽媽操勞。當彭羚見到記者亦不忘跟大家說「早晨」打招呼，但由於老公林海峰要到電台開咪，故未能帶囡囡返學。

至於同樣就讀該校的陳康堤，去年有爸爸陳奕迅及媽咪親自帶返學，不過昨早就未見陳氏一家，而陳奕迅太太於上午九時在微博留言不會到學校接送女兒，請傳媒不要守候。

蝦餃仔返學開心

由於昨日為開學日，故十二時半便放學，彭羚、商人丁午壽新抱何穎雯及丈夫丁天立都親自接囡囡放學，與女兒分享每年開學的寶貴時刻，絕不假手於人。不過，直至放學一刻，記者們仍未能見到康堤蹤影。而李克勤太太盧淑儀昨日亦如常送囝囝上學。

此外，陳慧琳（Kelly）前晚大方提到仔仔劉昇已入讀Playgroup，問到「蝦餃仔」有否喊？Kelly笑說：「冇，有得玩就開心。」一直充當髮型師的Kelly透露忍痛為蝦餃仔剪短髮，她說：「老師叫我幫佢剪，只係剪短少少啫。（擔唔擔心蝦餃仔被追訪？）記者一定會影佢啦。」

採訪：音樂組