Jeana回味床戰水宇交融
向來言行大膽的o靚模Jeana（何佩瑜），在處女電影中與陳柏宇有激烈床戲，雖然演出時七情上面，但Jeana受訪時坦言每當回想起拍攝情景，即忍不住面紅，床戰畫面更在腦中徘徊不散。
Jeana在處女電影《喜愛夜蒲》中有多場大膽情慾戲，對手更是有「啫神」之稱的陳柏宇（Jason）。Jeana坦言當初接到劇本時，不但未有被情慾戲嚇怕，還覺得挑戰性十足。
拍完嗌救命
Jeana表示拍攝時除帶定牙刷給自己及Jason清潔口腔外，又自備香口膠及烏龍茶，務求拍攝時口腔味道清新，Jeana笑謂：「咁樣先可以避免尷尬，我哋埋位之前傾咗好耐偈熱身，Jason亦講得好清楚會掂我邊度。」
Jeana不諱言拍攝時雖然好緊張，要不斷「自我催眠」，她說：「我同自己講愈緊張就會拍得愈耐，就愈尷尬，所以決定豁出去，當正Jason係男朋友，最後好順利，拍咗個多小時搞掂。」
談到拍畢該場戲的情況，Jeana面紅指自己第一時間叫救命：「當時我雖然打咗底，但都叫冇着衫，好尷尬，惟有嗌救命等啲工作人員攞件衫畀我披。最搞笑係，拍拍吓突然有個人頭伸出嚟，望真啲原來係專登嚟偷睇嘅連詩雅，激死。」
拒絕一夜情
問Jeana與Jason拍完床戲後會否難以抽離？她竟直認不諱：「第二日見到佢有種好奇怪嘅感覺，之後個腦又不斷湧現拍床戲時嘅畫面。」邊說邊傻笑的Jeana，直言要花數天時間，才能將與Jason的情色畫面從腦中洗掉。Jeana又指不會玩一夜情：「雖然我外表好似好開放，但我接受唔到，同男仔相處都要超過幾個月先可以拍拖。」
文：影視組