正在與栢芝搞離婚的謝霆鋒前日返港慶祝31歲牛一，下午他跟一對兒子共度快樂時光後，晚上就約了好友郭偉亮和女友葉佩雯、妹妹謝婷婷和男友安志杰、伍允龍、劉浩龍、父親謝賢等在屋企食飯切蛋糕，母親狄波拉因不在港而未有出席。雖然是發離婚協議後首個生日，但有一班好友陪伴，不愁寂寞的霆鋒度過了一個愉快晚上。
據知，當晚冇人在霆鋒面前提張栢芝，免勾起他的傷心回憶，大家傾偈講笑，又陪霆鋒打機，他收到遊戲機、運動衫、朱古力等禮物。本報致電葉佩雯，她說：「自己病咗個幾月，同男友上去一陣，霆鋒心情冇乜特別。」伍允龍則說：「成班朋友食飯傾偈，我送咗健身器材畀佢鍛煉前臂，祝佢詠春愈練愈好。」另好友陳奕迅、古巨基和經理人霍汶希亦在微博留言祝福。而英皇藝人孫祖揚亦在微博上載與「哥哥」霆鋒的合照，並留言祝他生日快樂。
霆鋒目前忙為大陸劇集趕戲，據知劇組特別讓霆鋒放假2、3天慶祝生日，劇集要拍到10月尾才煞科，消息指霆鋒9月尾會再返港出席代言活動。