馬浚偉拍外景受阻
馬浚偉與鍾嘉欣昨日在石硤尾街頭為新劇拍撞車戲疑太逼真，嚇壞現場一名老婦誤以為發生交通意外，即時報警指有「電單車剷上行人路掃低幾件」，警方及消防人員接報一度以為發生災難性交通意外，馬上派員趕赴現場，才知道是一場誤會。不料其後再有女途人站在拍攝用的電單車旁，造成干擾，屢勸亦不肯離開，劇組只好停止拍攝。
事後記者向馬仔了解，他稱與嘉欣正為無綫新劇《當旺爸爸》拍一場撞車戲，劇情需要由多名臨時演員扮學生被撞低。當時一名路過老婦很緊張，誤以為真的發生車禍而報警，最後知拍戲已未有再理會。
被指影響環保
不過，據馬仔透露，現場情緒激動的是有另一名婦人，對方因不滿外景車開着冷氣停泊在路邊影響環保，因而發難不肯離開。他說：「我哋喺車上換衫，有時限嘅，之後都會熄匙。但佢講到走埋嚟我哋身邊，我攬住嘉欣行番上車冇同佢衝突，免得再刺激佢。後來等佢走咗，我哋咪攝位拍埋餘下戲份，最後都搞掂咗。」
馬仔續稱：「不過我都要讚警方喺呢方面反應好快，我都估唔到咁快有警車到場。」他又指無綫拍外景向來依足程序申請，令次也不例外。昨日拍攝撞車戲雖被誤以為真，警方到場亦沒有干涉，只因有人情緒激動，幸最後都受控離開。馬仔說：「嗰位太太可能情緒問題，不停辱罵我哋，鬧得好難聽，又話我哋自私、無良，仲話因住拗柴！」
文：影視組