克勤情繫TVB：誰願分手
李克勤昨日舉行「船P」宣布續約環球三年，自爆酬勞足夠給家中兩位「老闆」交學費，而續約後的克勤依舊未能亮相無綫，身為「無綫親生仔」的他以自己一曲《誰願分手》形容對無綫不離不棄，認真有情有義！
克勤昨日罕有地一身沙灘look及人字拖登船舉行續約「船P」記者會，寓意歌唱事業一帆風順，眾人還即場在一塊滑浪板上簽名進行簽約儀式，唱片公司高層黃劍濤（Duncan）送上headphone給克勤，揚言要他只聽「環球音樂」，克勤即笑言：「係咪要我淨係聽晒環球嘅說話，唔好聽其他唱片公司嘅說話？」之後克勤和Duncan率領一眾工作人員到甲板放「孔明燈」，寄望事業能再創高峰。
酬勞有升夠交學費
問克勤續約酬勞可有升幅？他笑笑口說：「OK啦，開心價，Duncan叫我唔好理，佢話夠我兩位小朋友返學嘅學費，我同環球合作咗11年，最重要係佢哋嘅團隊精神打動到我，同埋用心做音樂！」相隔7年沒推出過國語碟的克勤，計劃10月推出全新國語碟開拓內地市場。
自比滑板並非主導
另外，談到環球跟無綫（TVB）「破冰」之日未了期，克勤即嚴肅表示：「我以《誰願分手》去形容，幾時實現真係唔知，亦唔係我可以控制，不過朋友依舊，之前我撞到方小姐（方逸華）同六叔，大家都有打招呼！」克勤透露雖不可亮相無綫獻唱，但可接拍劇集及主持：「我anytime都ready，但唔係我揸主意，涉及嘅問題千絲萬縷。」對於今年仍未能出席《勁歌》頒獎禮，克勤無奈說：「我只係一塊滑板，個方向去邊唔係我主導，企喺滑板上嘅係Duncan！」
採訪：音樂組