傅穎谷不出淚 死狗道歉
傅穎日前聲稱被前男友羅仲謙打傷，事件愈鬧愈大，昨日又有報道指傅穎被謙仔掟到屁股開花！兩人見事態嚴重，昨日立即首度前後腳開記招解畫。自知衰爆料的傅穎雖然一副「死狗」樣道歉，可惜谷不出眼淚。而謙仔亦向傅穎道歉，但多番否認曾痛毆女方及一腳踏四船，拒絕背負「賤男」之名！
傅穎自爆遭舊愛謙仔騙情及傷身後，連日來臭史愈揭愈多！昨日兩人在星皓經理人公司安排下會晤傳媒欲為事件降溫，謙仔更是五日來第三度開記招。據知星皓為免「反目情人」尷尬，謙仔及傅穎於不同時間到達及離開公司，同處公司一小時也是分房坐，故未有碰面。
穿白色短袖Tee及黑長裙的傅穎，在胞姊陪同下現身。精神尚好的傅穎一開口就向公司老闆、同事、家人及朋友交代整件事，對所有受影響又愛錫她的人致歉。當她提到被謙仔打傷時即嗚咽說：「媽咪見到我傷勢，好傷心，令我好心痛，好對佢哋唔住。」但始終流不出眼淚。
以後向公司報告
傅穎又以「係好難令我釋懷嘅傷心事」來形容與謙仔的舊情，她又說想「擺低呢個沉重嘅包袱，抹走呢個陰影」才起程去北京發展，她更為在公司不知情下爆料而多番道歉：「我覺得好對佢哋唔住，我承諾以後唔會發生、去做呢啲事，以後有乜嘢都會同公司商量。」
可惜昨日又有雜誌爆料指羅仲謙掟傅穎埋窗，令其屁股瘀傷，亦暴露了傅穎腿部肌肉鬆弛及臀部布滿橙皮紋。當她起身離開時被問傷勢如何？她只「唔」了一聲就掩嘴、擰頭走人，對其他問題一律不答。當她坐車抵達寓所落車之時，見她左腳小腿有一撻瘀痕。
傅穎講完一輪後，穿着Chaotic字樣（意指亂糟糟）T恤的羅仲謙「接力」剖白。面對傳媒時心情緊張的他多番抖大氣，同樣為受影響的同事、公司及朋友致歉。問可有向傅穎道歉？初時他沒有回答，只自顧自說：「我同傅穎一齊嗰時，有開心，亦有鬧交，唔想公開講細節。但無論喺咩情況下，對佢身體有任何傷害都唔啱，我對傅穎道歉。」
謙仔強調沒嚴重傷害前女友：「我否認有痛毆佢，亦都冇『一腳踏四船』！（一腳踏兩船？）都冇。以前個北京女朋友已經分咗手，佢有新男友。」問之後會否與傅穎一齊工作？他就指由公司安排。問到「如何打傅穎」、「你覺得係咪賤男」及「溝女王之名」等問題亦一律不回應。
星皓有相應處理
星皓老闆王海峰接受長途電話訪問時說：「佢哋兩個嘅私人事，公司唔會理，只望佢哋唔好再將私事講出嚟，要告一段落！公司對佢兩個都有行動，我依家喺北京，遲啲返香港處理。」而營運總裁陳慧海被問是否與傅穎解約或雪藏時，她說：「公司有相應嘅處理，細節唔講，不過做乜就經理人部分安排。」
另外，盛傳謙仔的「小三」是落選港姐蔡慧欣，但亦有傳是另一落選港姐甄敏婷。有指兩人在台灣拍港姐外景時搭上。現疑似「小三」的甄敏婷身在加拿大，九月初才返港參加藝員訓練班。
文：音樂組