霆鋒搶手握9片狂吸1.6億
鋒芝結束四年多婚姻關係，兩人各自向事業出發，據知，攞完金像影帝兼被周潤發點名大讚的霆鋒，獲多位導演垂青，目前手上有9部片約等他點頭接拍，據知霆鋒片酬高達1,800萬，如果9部戲全部接晒，則瘋狂吸金逾1億6,200萬，十分和味。
爾冬陞斟掂開戲
消息指霆鋒已落實接拍爾冬陞（小寶）監製的懸疑片，跟另一位影帝級劉青雲合作，小寶可說是栢芝的恩師，他執導的電影《忘不了》更助栢芝圓影后夢，可惜年前小寶邀生完Quintus的栢芝復出拍《大魔術師》時，因檔期問題告吹，令兩人之間種下芥蒂，相反小寶跟霆鋒卻從未合作，想不到當日小寶攞唔到栢芝產後復出第一炮，今日卻奪得霆鋒離婚後首部片約。
本報向霆鋒經理人霍汶希求證，她說：「霆鋒有9個劇本揀緊，小寶呢部戲接拍成數幾高，要睇檔期再落實。」她謂昨天有跟霆鋒通電，他心情沒受離婚影響，專心工作；而小寶的老婆則表示劇本很適合霆鋒拍攝，問小寶有冇跟栢芝聯絡？她說：「小寶啱啱拍完《大魔術師》返嚟，栢芝就喺寧波，冇乜點聯絡。」
拍打戲踩12粒鐘
至於離婚的栢芝亦全情投入工作，據知她拍完《河東獅吼II》後，將返港為電影《影子愛人》錄主題曲，預備出碟再戰樂壇，另亦接拍了電單車廣告及跟內地床上用品廣告續約，吸金能力不弱於霆鋒。而栢芝昨清早6點開工，踩行12粒鐘拍打戲，心情冇異樣，剛巧內地導演陸川亦在影視城拍戲，特別往探班，現場亦有旅客為栢芝打氣，據內地消息指，栢芝今日現身武漢出席珠寶店剪綵。另有傳栢芝和Lucas合拍的電影《無價之寶》在內地3日收500萬人民幣票房，不過電影宣傳部指報道不實。而栢芝主演的電影《楊門女將之軍令如山》的海報及花絮照片昨亦曝光。
此外，另有雜誌指Lucas因淋雨病倒，周小姐直斥報道「作得就作」，她說：「Lucas無病過，之前栢芝同霆鋒十九日仲一齊同Lucas出席學校家長日，好多人都見到Lucas好活潑。」
文：音樂組