周杰倫叉足電風騷獻sing
台灣歌手周杰倫（Jay）近日被踢爆跟「混血o靚模」昆凌同遊歐洲慶祝成人禮，據知昆凌行奶奶政策，被發現跟周媽媽同一班飛機返台灣，關係不言而喻，難怪Jay前晚在音樂會上心情大靚，表現風騷。
Jay近日被傳出搭上剛剛滿18歲的「混血o靚模」昆凌，更被旅客踢爆二人遠赴歐洲慶祝成人禮，前日昆凌被台灣傳媒拍到她跟周媽媽乘搭同一班飛機返台，當記者拍照時，昆凌刻意將cap帽拉到勁低遮面，她未有回應是否跟Jay同遊賀生日。另外，Jay昨日在微博上載一條香港機場反拍狗仔隊的短片中，見到友人為他孭住的意大利品牌Davis袋與昆凌所拎的一模一樣，情侶袋足可印證Jay跟年齡相差13年的昆凌的親密關係。
粉絲嫌唔夠喉
甜蜜假期結束後的Jay心情大靚，前晚出席香港的「Loud Festival」音樂會，跟樂隊蘇打綠、袁詠琳及香港代表Mr.等接力表演，一向愛追星的何超蓮亦是座上客，壓軸登場的Jay全程表現風騷，短短三十多分鐘內，以彈琴、結他、Beat Box等多款表演大冧觀眾，他在台上說：「今天來港時遇到狗仔隊偷拍我，但我帶着很好的心情去反拍他們。」音樂會門票開賣前，主辦單位承諾Jay的演唱時間一定不少於45分鐘，但最終只演出約37分鐘，令不少歌迷嫌唔夠喉。
Alan忘形墮窿
另外，Mr.主音Alan全晚high爆狂嗌，期間一度在舞台上碌來碌去，不慎碌落舞台升降台的窿入面，幸好未有受傷，更即時跳番上台繼續唱，他昨日在活動上透露：「個窿有四、五呎深，依家隻腳傷咗。（女友擔心？）始終都會擔心，屋企人同校長（譚詠麟）都有問候我。」提到被踢爆Alan講大話，隱瞞女友正是富家女Sally，他不置可否，只稱女友是圈外人。
採訪：音樂組