洪朝豐提點敖嘉年珍惜擁有
唔講唔知，敖嘉年早於96年時，已被洪朝豐看好，並提攜他擔任電台唱歌節目，之後更力薦嘉年入無綫。眼見徒弟今時今日有好成績，洪朝豐大感安慰，更提點嘉年「花無百日紅」，一切都要珍惜。
無綫藝人敖嘉年、洪朝豐兩師徒日前相約到酒樓飲茶，大談過往軼事之餘，洪朝豐更即席教嘉年唱歌要訣。其實二人早在96年於電台時已認識，當時，洪朝豐稱呼嘉年為P仔（敖嘉年當年英文名叫Pierre），至於嘉年則稱呼對方為洪大哥，當日二人出來敍舊，仍然以此來稱呼。
要安守本分
洪朝豐當年因睇好嘉年而提攜他擔任一個唱歌節目主持，他力讚嘉年謂：「十幾年前佢已經好有感情、節奏感，我覺得佢好有明星相，唔係青靚白淨，係有個人風格，佢份人好純，對藝術好堅持，佢把聲都唔錯o架！」
除此之外，當年嘉年加入無綫，亦是經洪朝豐介紹，洪朝豐坦言開心這兩年見到嘉年有成績，他說：「兩年前我哋都相約出嚟飲茶，我好開心佢有成績，我都有提佢『花無百日紅』，佢捱咗十年終於有出頭，我同佢講唔好理人講乜，要做好本分。」
患難見真情
至於二人之後會否有合作機會？洪朝豐坦言：「Never say no！我都希望有咁嘅一日，我都唔排除有一日自己會做番戲，我之後都可能做粵劇或拍劇，已經有人搵我傾。」洪朝豐做了電台27年，目前他亦再開咪為網上電台做節目，他不諱言：「佢哋搵我時好有心，我敢講，我8月19日開咪，如果呢個日子有人用好多錢請我，我都唔會去，我係一個有情有義嘅人！」
當年洪朝豐患有精神病時，嘉年都曾以無綫主持身份與他做專訪，嘉年說：「佢發生乜嘢事我都會支持佢，依家見到嘅佢，同我當年喺電台見到嘅佢一模一樣！」
文、攝：影視組