陳奐仁爆祖兒打瀉臭湯
音樂人陳奐仁（Hanjin）苦心經營七年的錄音室宣布「結業」，二千呎的工作室將變成二百呎「蝸室」，Hanjin最難忘與天王天后錄音室珍貴點滴，容祖兒打瀉臭湯，搞到臭氣熏天。
來自新加坡的Hanjin七年前將工作基地移來香港，與音樂人Alex Fung在中環投資開錄音室，近年Hanjin幕前幕後「吃得開」，但面對市場萎縮，只得忍痛結束錄音室。Hanjin坦言：「我同Alex要一年做一百首歌先維持到，但依家市場邊可能！加上業主話大廈被收購，所以決定唔搞錄音室。」不過，Hanjin強調工作室搬遷後，一切音樂工作如常，只是工作室由二千呎縮成二百呎「蝸室」，而錄歌部分要租用外面錄音室才行。
霆鋒Chok住借可樂
在錄音室的七年間，不少歌手令Hanjin留下難忘回憶，最經典一位可數容祖兒，他笑言：「祖兒上嚟錄歌時留低咗壺湯，大家冇為意，事隔一星期祖兒上嚟先發現壺湯放喺度，好衰唔衰，仲將壺發霉發臭嘅湯打瀉落地氈，嚇到祖兒漏夜call人幫手買清潔劑，而嗰壺壞湯嘅臭味，足足臭足一星期先散。」
謝霆鋒曾於同一大廈開Band房，Hanjin指這位舊鄰居當年已是Chok神，試過有次聽門鐘響開門，就見到霆鋒挨住門邊，一手插褲袋，一手托額頭來問他借可樂，還有其他歌手喜歡來他錄音室「Hea」時間，林海峰喜歡在這裏度橋。
黎明錄歌要等狀態
Hanjin指歌手錄音習慣各有不同，十居其九愛「磨歌」，將一首歌唱好多次，如天王黎明要「等狀態、捉心情」，他謂：「佢係老闆，好多嘢令佢分心，所以要培養佢有輕鬆心情錄歌，而天王就有天王嘅自信，狀態到，一兩Take就搞掂。」
即將告別「錄音室」，Hanjin樂天說：「唔可惜嘅，開過已經滿足。（有機會再搞？）有機會嘅話，最想錄音室開喺屋企，日日玩音樂。」
文：高美 攝：李柏儒