張舒雅學精封嘴護新歡

張舒雅與熊黛林（Lynn）、劉丹、戴小奕、姚予晴、楊汀叮等，昨日齊以師姐身份出席《海港城STYLE Model Hunt模特兒大賽2011》。她表示也有留意今年的港姐，大讚季軍許亦妮眼大大幾靚女。她不知道對方多是非以及多男友的傳聞，當問到她的男友數目可會破許亦妮的紀錄？她即說：「我冇，我梗係冇啦！」

新男友係圈外人

再問她是否仍與之前那位補習天王男友趙永康一起？她說：「唔講自己嘢。冇講成年，冇影到成年啦！唔講喇！（咁係咪仲一齊？）唔答喇，學精咗唔講感情事。（即係散咗？）都係嘅，唔講啦。（新男友係圈內定圈外？）不嬲圈外。之前嗰個都散咗一年喇！（咁呢個拍咗幾耐？）我都冇講過有，我唔知呀！我同之前嗰個係和平分手嘅。」

張舒雅承認跟補習天王男友已分手一年，現已另結新歡。	姚予晴（左起）、劉丹、戴小奕為公司揀蟀。	熊黛林嬌嗲否認同居之說。

Lynn唔慣同居

另外，同場的Lynn被問到日前有報道指她跟郭富城同居一事，Lynn說：「我唔想答呢啲，講得愈大錯得愈多。我唔會試婚，冇呢個習慣。（同城城住？）我自己有地方住，我鍾意自己一個住。（你喺城城屋企自出自入？）唔答喇，我唔想呃傳媒，但又唔想答，費事啲人愈做愈大。我自己開心就得，最緊要自己知。（急唔急要名分？）咩名分呀？（郭太呀！）唔要喇，冇諗過咁早結婚。郭太好似好老咁。（城城唔細係時候結婚？）佢睇落似廿幾卅歲啫。」而她前晚出席另一活動時就表示很期待跟城城在電影中合作，不會因情侶檔上陣加片酬。文：名人組