陳爽轉戰office做女強人
07年中華小姐陳爽與無綫仍有合約，為一嘗女強人滋味，她與TVB「傾掂數」，出外闖一番事業，由藝人變身朝九晚五行業，她坦言一切尚待習慣，不過工作上就感到相當滿足及有挑戰性。
陳爽參加選美後加入無綫三年多，雖然與無綫還有數年合約，不過她就與公司「傾掂數」，以半退出娛圈般，外闖打天下，現時陳爽是香港航空擔任營業及巿場部香港企業銷售經理。一身事業型女性打扮的她，日前更於公司接受訪問，陳爽坦言工作了兩個月，一切仍在習慣中，卻感到相當滿足。說到與無綫的合約，她說：「同公司都傾好晒，唔會有衝突，公司都好支持我，叫我可以去試試，依家除咗航空公司工作，無綫如果有工作，又就到時間的話，我都會出席，但會以目前的工作行先。」
藝人生活同事好奇
陳爽在外國讀大學時修讀經濟，問她為何不選擇類似工作時，她謂：「我其實都有考慮做金融，不過需要嘅時間會更加多。」陳爽不諱言現時返朝九晚五，與之前娛樂圈的返工時間有很大分別，故仍習慣中。
剛上班時，同事對這位漂亮藝人及娛樂圈工作相當好奇，陳爽笑言：「同佢哋熟咗之後，佢哋不時問我有關選美、拍攝嘅嘢，之前我去睇《香港先生》選舉，仲叫我帶埋佢哋去，我諗有份演出的劇集一出，佢哋都會有好多嘢問我。」
文：影視組