鄧麗欣自由身未諗續約金牌
鄧麗欣昨日與黎耀祥出席活動，她透露與金牌大風公司已約滿，問會否續約？她說：「傾緊，亦有同其他公司傾，之前內地拍劇未有時間，我想重視未來發展去向。」有傳宿敵傅穎將到北京發展，她說：「唔知。（避開佢？）唔可以唔去北京，大城市嘛。」提到有指方力申因她不續約金牌大風亦會相繼離巢，她說：「佢仲有一段時間合約，我完咗都唔關事。」
同場的祥仔透露《法證先鋒3》被安排台慶劇播出，記者笑他是視帝大熱，他說：「唔好咁講，呢啲講天時地利人和。今年有謝天華、鄭嘉穎。我覺得對黃宗澤好唔公道，佢喺《潛行狙擊》做得好好，可能個個估錯，最後係佢。」另外，廣管局接獲五宗有關《潛》劇投訴，指內容涉及暴力和性題材，對小朋友有影響。