山聰是無綫藝員，眾所周知暫時收入不多，與賭王千金財雄勢大的家族背景難以相提並論，令外界指兩人關係女尊男卑！不過山聰力撐有澳門搞生意的哥哥關照，養得起自己和女友有餘！
記：超雲話你中間有段時間返咗香港，但你一直冇喺香港出現過，究竟去咗邊？
聰：我返咗上海足足一個月，因為屋企有事，乜嘢事就唔講得，後尾知佢要返香港，所以飛咗去倫敦陪佢一齊返香港。
記：冇工作咁耐冇收入？
聰：唔會，無綫有出糧，可能請假會扣錢，但我check過戶口冇扣到錢，可能因為之前我都儲咗好多假仲未放。
記：之前有指你欠交旅行社四萬幾蚊嘅機票錢未找數？
聰：（突然嚴肅起來）呢樣我要澄清，當日我係託朋友搵旅行公司訂機票，我一早畀晒錢個朋友，點知個朋友最近先找數，我唔會為幾萬蚊走數！講都冇人信，叫咗經理人處理。我唔識嗰間旅行社，佢哋唔調查清楚好唔專業。
記：點解遲咗找數？
聰：我朋友病咗入院。
記：話你走數唔開心？
聰：（語帶嬲怒）係好唔開心，因為唔係我直接訂機票，唔查清楚就周圍好似貼街招咁，又唔通知我，要搵我唔難，我覺得佢哋專業操守有問題。
記：你依家財政點樣？
聰：正常，夠我生活，澳門哥哥公司有錢出畀我。
記：照顧女友都冇問題？
聰：我淨係會買啲小禮物，佢又冇叫我買鑽石。
記：賺幾多錢先會結婚？
聰：冇諗！我哋覺得唔應該用金錢衡量，如果大家係介意錢，就唔可能喺埋一齊，兩個有共識，拍拖就拍拖，唔關錢事。好多人都話我貪錢，我同屋企人知唔係就得。將來萬一感情有問題亦一定唔關錢事。