陳山聰未敢諗娶超雲

聰：陳山聰　記：記者

記：超雲公開你哋情侶關係後，後咪好多人恭喜你？

聰：係太多人打電話畀我，我都冇聽電話，因為好攰。

記：尋晚（前晚）係咪第一次同賭王食飯？

聰：係第一次食飯，其實之前都見過一次，嗰次喺何生屋企，大家都係Say Hi見吓面，但食飯就第一次，所以我好緊張。

記：你同賭王有冇傾偈？

聰：有傾偈，佢好好人。

記：賭王有冇叫你錫住超雲？

聰：冇提及，佢有問我做嘢嘅嘢，佢之前都有睇我演皇帝嗰部《洪武三十二》。

記：賭王讚你演得好？

聰：（開心地笑）冇講，不過有問起個皇帝幾多歲。

記：仲有冇傾啲乜？

聰：後尾大家影咗張相，何生就休息，唔想打擾佢。

有共識公開

記：三太（陳婉珍）都係第二次見？

聰：係。

記：有部分傳媒話三太唔鍾意你？

聰：傳聞啫！Auntie都有叫去食飯，就知嗰啲所謂嘅傳聞唔係真。

記：超雲公開你哋嘅關係，係咪鬆咗一口氣？

聰：冇話鬆口氣，真正拍拖，唔想影響太多人，我哋大家有共識傾咗好耐，佢屋企人都畀咗意見，大家OK先公開。

記：外界都稱呼你做賭王未來女婿，你點睇？

聰：唔好咁講，拍拖啫！一段愛情，一段關係，大家誇張咗，拍拖就拍拖唔諗咁多！依家淨係諗做嘢，遲啲拍添哥（李添勝）部新劇，要收拾心情，遲啲要聽劇本。

記：有冇承諾畀超雲？

聰：畀心機做嘢就係對佢最好嘅承諾，事業為重，同埋對佢好啲。

記：外界經常將你哋嘅身份作比較，形容係女尊男卑，你點睇？

聰：外面有好多唔同聲音，有啲恭喜我哋，有啲反對，早預咗，我哋唔會理！我單身佢又係單身，大家背景唔同一早知，喺得埋一齊就唔會理會太多。

記：有冇諗過娶超雲？

聰：（笑）大家未諗住結婚，談緊戀愛。

賭王知離婚

記：你曾經離婚，會唔會對你哋呢段感情造成障礙？

聰：以前嘅事都過咗去，每個人有唔同嘅過去，今次係新開始。

記：賭王同三太知唔知你曾經離婚？

聰：應該知，報紙都有寫，同埋超雲都有同佢哋講，我冇過問，唔想受過去嘅事影響。

記：同超雲發展有冇信心？

聰：我哋啱啱開始，畀啲空間同時間我哋試吓互相了解。我係有信心嘅，希望舒舒服服咁正常拍拖，食飯睇吓戲。

記：嚟緊九月你要開劇，到時要做嘢冷落女友？

聰：唔會，為做嘢佢會明白，會適應。

記：你哋拍拖有冇規定每日要打幾多個電話，發幾多個短訊？

聰：冇特別，啱啱拍拖一定會打電話同發訊息，好自然。

認女友難追

記：其實你係點追超雲？

聰：（開心地笑）吓！可唔可以唔講，冇刻意。

記：超雲係咪好難追？

聰：難，點會唔難？話唔難就好驚。

記：你用乜方法氹超雲？送花？

聰：每個女仔都鍾意收花架啦！做啲令佢開心嘅嘢囉！

記：令超雲開心容唔容易？

聰：難！要估架！平時佢講話可能漏兩句，留意佢鍾意乜。

記：咁超雲鍾意乜嘢？

聰：佢乜都鍾意。

記：超雲係咪最鍾意你嘅心思？

聰：係，我哋兩個都鍾意時裝。

記：送過啲乜嘢禮物畀超雲？

聰：送過耳環、頸鏈。

文：名人組