李妮營商有道食為先
只要去過Lily的商店，一定品嘗過她為客人準備的免費有機咖啡及花草茶。豪爽的Lily笑言這些支出不算甚麼，因為她最想做到的是待客至誠：「唔好睇小一杯有機茶或咖啡，可以令人好放鬆。我鍾意邊同客人飲茶，邊了解佢哋需要。」她與老公更在陽澄湖飼養有機大閘蟹，希望友人吃得更健康：「我哋會用有機粟米同螺仔餵蟹，雖然未必好大隻，但一樣好多膏，而且肯定健康。」
九四年當選亞姐冠軍的李妮（Lily），翌年已開始着手第一盤生意，天生愛吃的她，首先看中食肆生意，與友人合資開設餐廳連酒吧，之後生意擴展至新加坡。為何卸任後即退出幕前做生意？Lily笑謂：「我覺得呢行唔適合我，但我好幸運選美嗰陣得到一百萬獎金，加上之前喺大公司做過，吸收咗好多行政同管理經驗，覺得應該搵個平台學以致用。」
之後，滿腦子新主意的Lily又開了製作公司，卻遇上從商後第一個低潮，她說：「嗰時沙士，加上有日聽到哥哥跳樓嘅消息，我震驚到足足有三句鐘做唔到嘢，對香港前景失去信心，後來清醒番，我最擔心係員工嘅健康，就狂掃維他命C，為員工加強免疫力，結果捱吓捱吓就過咗一關。」
現在最令Lily醉心的，是有機護膚品生意，去年十一月才在尖沙咀開設首間專門店，短短半年已吸引新買家入股，並開設分店。天生皮膚易敏感的Lily，曾因錯用護膚品吃盡苦頭，所以當找到好東西後，便公諸同好。
談到營商秘訣，Lily說：「己所不欲勿施於人，做生意一定要過到自己，我傾合作之前，一定會諗清楚盤生意係咪真係值得推廣，要預咗蝕，唔好以為賺梗，必須有周詳計劃，要計吓就算無生意，舖頭仲可以捱幾耐。」