超雲首開腔：我同陳山聰拍拖
賭王何鴻燊三太長女何超雲和無綫藝員陳山聰的關係像霧又像花，不過兩人未為關係正式解讀，就已經要共同面對外間的流言蜚語：門不當戶不對、男不工作女不理父親歐遊拍拖去。昨日何超雲接受本報訪問，首次開腔承認和陳山聰已拍拖四個月，賭王已見過陳山聰外，直言父母從未為這段戀情添上半點壓力。
一直在英國攻讀時裝設計課程的何超雲，昨日終於由英國返港。昨日下午約一時許，以黑超、草帽配上碎花Jumpsuit打扮現身的超雲單拖出閘，一早在場守候的助手及保鏢即上前迎接，而現場十多名記者亦洶湧而上，追問為何不跟陳山聰一起出閘？在多番追問下，超雲才說在機上不適，待一切安頓好才向大家交代。期間超雲見緊貼追訪的傳媒在扶手電梯拍照，亦着他們小心免生意外。離開機場後，超雲直返位於布力徑的香閨。
據知，超雲是次返港，陳山聰陪伴在側，兩人更在頭等機艙並排而坐，陳山聰和超雲抵港後便各自分開，陳山聰直接從機場前往澳門和哥哥會面。超雲返港後，接受本報獨家專訪，甜蜜細說和陳山聰正打得火熱的一段情。
記：記者 雲：何超雲
記：今次返香港係咪好緊張？
雲：係，我都諗唔到一落機就有記者，我同山聰都好狼狽，影我哋時我哋冇拖手。
記：你同山聰一齊返香港？
雲：係。
記：過去幾個月，陳山聰係咪一直喺英國陪住你？
雲：唔係，只係大約三、四月時山聰曾經嚟過英國探我，逗留咗五至六日，佢因為要做嘢要走先。
記：點解你咁耐唔返香港？
雲：我要忙做幾份關於design嘅paper。山聰知我今日返，佢因為唔放心我一個人返嚟，所以七日前特登過嚟英國接我返嚟。
「佢好直好錫我」
記：點解陳山聰返咗香港咁耐都冇露面？
雲：佢匿埋，因為好多負面新聞，暫時唔想曝光住。
記：你同陳山聰係咪拍拖？
雲：係，我同山聰拍緊拖。
記：你同陳山聰幾時開始拍拖？
雲：大約四個月前開始。
記：你喜歡陳山聰乜嘢？
雲：（語調甜絲絲）佢好直、好細心、好溫柔，同埋好錫我。
記：恕我直言，陳山聰呢七日喺英國，係咪同你住埋同一間房？
雲：唔係，我有個女朋友同我一間房，山聰住喺隔籬房，呢七日我要繼續為paper搜集資料之外，我同山聰都有一齊行吓街，食吓嘢，遊覽吓。
記：你哋拍拖以嚟，係咪仲未發展到同房關係？
雲：我哋未去到呢個階段。
與爸爸保持聯絡
記：外間好多報道話你掛住拍拖，唔理爸爸，就連父親節都唔返嚟陪佢，話你爸爸好嬲？
雲：咁樣畀人寫，呢啲報道真係令我好唔開心，其實爸爸從來冇嬲過我，冇責怪過我。爸爸知道我要做功課所以先至返唔到嚟。我同爸爸一直都有通電話，亦都有好密切嘅書信聯絡，有時爸爸會話：「阿女，好耐冇見，好掛住你！你幾時返香港呀？」我就話：「爸爸，我都好掛住你，我一做完功課，會即刻返嚟陪你！」
記：報道話你媽媽反對你同陳山聰拍拖？
雲：唔係（語氣肯定），其實媽咪已經接受咗佢好耐，佢知我哋拍拖，媽咪都覺得山聰為人幾好。爸爸都有見過山聰，父母完全冇反對，對於我哋拍拖係好放心，從來冇畀壓力我哋。
文：名人組 攝：追蹤組