拉姑苦等120日見孫笑番晒

自鋒芝危情驚爆後，嫲嫲狄波拉一直冇得見乖孫，連Lucas的4歲生日亦不獲邀出席，只能黯然飛泰國為愛孫祈福，令老人家痛心疾首！直至現在鋒芝婚變有定局，日前已返港的拉姑終於有得見心肝寶貝，跟Lucas補祝生日；加上哮喘復發的霆鋒前晚已出院，令拉姑再現歡顏。
拉姑與老公鬍鬚Kong在中環超市拍拖購物。
拉姑與老公鬍鬚Kong在中環超市拍拖購物。

因鋒芝婚變蒙上幕後黑手之冤的拉姑，上月接受本報專訪時，坦言自4月見過一對乖孫Lucas和Quintus後，一直沒機會再見面，更踢爆過往要跟乖孫玩、過生日，都要向「人」申請待批，甚至上周二Lucas的4歲生日，身為嫲嫲的拉姑亦冇份出席生日會，惟有黯然飛泰國為Lucas祈福，還慨嘆：「我年紀都大咯，唔知將來仲有冇機會同孫仔慶祝！」

心情靚與夫行超市

據知，由於鋒芝已取得共識決定離婚，栢芝只想要一對兒子的撫養權，其他離婚細節就交律師處理，鋒芝的婚姻問題有解決，拉姑終於可以見孫了！據知，拉姑日前已靜悄悄跟老公鬍鬚Kong返港，等了120多日的拉姑，終於在Lucas生日後，有得見到一對乖孫，消息指拉姑帶乖孫出外耍樂，跟慈姑椗Lucas補祝快樂生日，三嫲孫玩得好開心，樂也融融。

栢芝終於也讓Lucas跟嫲嫲見面。（資料圖片）
  • 栢芝終於也讓Lucas跟嫲嫲見面。（資料圖片）
拉姑終於可以跟Lucas補祝生日。（資料圖片）
  • 拉姑終於可以跟Lucas補祝生日。（資料圖片）
碧芝（左）帶埋女兒與Lucas一齊跟學校去旅行。（資料圖片）
  • 碧芝（左）帶埋女兒與Lucas一齊跟學校去旅行。（資料圖片）

前日本報在中環超市發現拉姑跟老公鬍鬚Kong拍拖購物，穿上紅裙的拉姑人如其衫心情靚爆，兩公婆在超市穿梭挑選心頭好，沿途有傾有講晒溫馨，兩人埋單之後，鬍鬚Kong發現記者影相，即做阿四幫拉姑攞東西，記者上前問拉姑有冇見乖孫？心情靚爆的她笑容滿臉說：「有呀。」問幾時見過乖孫？孫仔情況如何？拉姑只露出老懷安慰的笑容，沒有回答即上車離去。另本報致電謝賢問有冇見孫？他說：「我唔喺香港，呢啲有乜好問。」即匆匆掛線。

碧芝幫細妹湊兒子

由於目前鋒芝各自身處大陸開工，一對兒子就住在陽明山莊，交由栢芝家姐碧芝照顧，據知，4歲的Lucas即將入讀幼稚園K1，栢芝為了兒子能適應學校生活，今個暑假幫他報讀了playgroup，昨日剛巧是學校旅行，雖然連場大雨，但碧芝仍帶女兒跟Lucas參加，隨學校到大埔的小白鷺餐廳旅行，據現場消息透露，餐廳內有好多小朋友的玩意，如堆顏色沙、玩手工藝，平日好動精靈的Lucas，昨日卻表現文靜，而且消瘦了點，不停叫姨媽。

至於身在北京拍劇的霆鋒，前日因哮喘病復發，工作人員急送他入院，昨日本報向英皇高層霍汶希查詢，她說：「霆鋒喺醫院留咗幾個鐘，要吸氧氣同打點滴，已經出院，佢休息咗一晚之後好番好多，今日已經復工，大家唔使擔心。」霆鋒除了忙拍劇外，本周六還要在北京做一場商演，跟張惠妹、林宥嘉同台演出。

文：音樂組

攝：追蹤組