區文詩鈴木仁3年情玩完
歌手區文詩（Angela）前晚與尹光、呂珊等出席公司周年晚宴。提到拍拖三年、已達談婚論嫁階段的日籍藝人男友鈴木仁時，Angela竟說：「自六月同佢去完日本之後已經冇聯絡。（發生咩事？）好多原因，一來分隔兩地，二來價值觀唔同。（結婚問題？）係，因為我未想結，佢又轉行移師去咗日本做生意，朝九晚五，同我生活模式已經好唔同！我做完嘢佢已經瞓咗，好難夾時間用skype（網上互動程式）聯絡。」
承認有人追求
問男友是否要求她移民日本？她說：「佢想我過去同佢生活，但係我仲細，唔想咁快，成件事完全唔可行。（如果佢返嚟呢？）應該唔會喇！（如果佢等你呢？）點等？佢日本人興早婚，雖然我之前話過想三十歲結婚，比自己一個交代，但我依家心理其實未到呢個階段。（依家有冇人追？）有，都有出街嗰種。（你有咗第二個？）唔係，完全兩件事。」
Angela慨嘆看到宣萱日前與外籍男友分手後，接受傳媒訪問時所說的感受，與自己很相似，令她覺得感同身受，更即場嘆一口氣後表示無奈。再問是否與鈴木仁已經分手？她則苦笑不答，不置可否。至於鈴木仁的手提電話轉駁到留言信箱，至截稿前尚未回覆。
文：音樂組