方中信揸300萬蟹貨：死無可死
恒指近日急挫跌穿2萬點，跌幅乃3年來新低，除了廣大市民成為蟹民外，不少圈中藝人也蝕到入肉，經歷過08年股災的方中信，昨日聞得再做大閘蟹時顯得無厘心機，透露手上300萬貨所剩無幾，預計隨時得番個桔，並高呼：「我冇眼睇！」
受美股拖累，港股上周五至昨日三個交易日共跌了2,554點，單是周五及周一兩天便蒸發1萬3千5百億港元，令不少愛投資股票的圈中人唉聲嘆氣，曾於08年股災蝕過百萬的方中信，今次亦難逃一劫，更不諱言已作最壞打算，預料300萬股票除時蝕到入肉，血本無歸！
趙彤蝕到爆炸
身在內地拍戲的他，昨日接受電話訪問時無厘心機，他謂：「真係冇眼睇，死無可死，剩番嘅都唔多，成300萬貨，重災區係中國銀行（3988），我$4.4買入，跌到得$3.1（昨日收市價為$2.98），搞到都唔想睇，當啲錢冇咗！但賣咗咪total loss？」他打趣表示正坐於影棚門口發呆，不知如何是好，已育有一女的他更謂：「惟有繼續努力搵奶粉錢囉！唔係點，（啲股票）都係畀晒個女啫！睇佢（大個女）好唔好彩啦！」
讀經濟學出身的袁彌明，則表示手上的期指也蝕了不少：「好在一直都有揸金同銀對沖，計番條數就將今年上半年贏落嘅輸番晒，冇咗60幾萬，咪等年尾再追番囉。（有咩策略？）我諗恒指會下望18,000，甚至再低啲，下次反彈會去到20,600就平倉同沽貨，18,000以下就分批吸納。」台灣妹趙彤對股災大感無奈，直言已蝕到爆炸，保守估計蝕了十多萬，她謂：「基金股我都唔敢去睇，因為呢啲當係長線投資，之前都有朋友同我講，要放就要一早放，但因自己冇投資經驗最後冇放，當係教訓囉！」
法拉趁低吸納
雖然有人蝕到入肉，甚至預料渣都冇得剩，不過亦有人趁低吸納，就如無綫姐仔陳法拉，昨晚坦言向來有投資股票，今次亦有損手，幸而數目不多，她謂：「都輸得起，其實都預咗會冧市，上星期四到依家，咪揸住啲貨先囉！冇影響到心情，尋日仲開始有趁低入市。」
文：影視組