Eason急閃祖兒謙虛稱后
《國語力頒獎禮2011》前晚舉行，賽果有如本報早前預測，來去匆匆的陳奕迅（Eason）獲頒三個半大獎，而印度西施造型的容祖兒以三獎冧莊成為女歌手大贏家，問她是否攞獎攞到慣？祖兒謙稱：「冇得攞嗰陣就唔慣！」
新城電台舉辦的一年一度《國語力頒獎禮2011》前晚假會展舉行，一眾中、港、台、星、馬等地歌手雲集，大會是晚共頒發98項獎項，其中Eason及祖兒分別以三個半及三個獎冧莊成為男、女歌手大贏家，包括同獲「新城國語力歌曲」和「全球最受歡迎至尊歌手大獎」，Eason除獲「年度歌手」，另跟重返樂壇的王菲合唱《因為愛情》而獲得「新城國語力歌曲」獎，聲勢如虹，祖兒則奪「全國最受歡迎歌手」而合共三獎在手。
台灣「過江龍」吳建豪、潘瑋柏、組合LOLLIPOP F等亦獲頒三個獎；在台上載歌載舞表演，皆大歡喜，因工作在身未能現身的羅志祥（小豬）單單播出短片也惹來全場尖叫聲不絕，認真厲害！
一家歐遊歎世界
Eason匆匆忙忙由馬來西亞返港，一落機便趕到會場中途參與，還未坐熱就被台灣音樂人黃韻玲拉上台即興合唱《樂園》一曲，成為全晚高潮。完騷後Eason又趕住返大陸工作未能現身慶功宴，問他7月底的生日如何度過？他說：「一家人去歐洲，雖然大家身處同一個國家，但係時空唔同，因為我全日留喺酒店房休息，好攰呀，我咪歎吓咖啡瞓吓覺囉，佢哋去行街、去動物園，畀我休息吓。」
日日練舞五粒鐘
祖兒完騷後現身慶功宴，但就未有食太多，她表示胃口欠佳，加上積極備戰內地的巡迴演唱會，每日都跳四、五小時的舞蹈，非常辛苦吃力。對於經常在頒獎禮上做「大贏家」，問到是否已經習已為常？她說：「唔係，當唔畀你嗰陣又會唔慣啦，繼續加把勁，做好工作！」她笑言頒獎禮最開心是見到一大班歌手，好好見面聊天，她說：「籌備演唱會日日見住個監製，做運動又係自己一個，真係悶到嘔，見到咁大班歌手，可以講吓笑，聯絡吓感情嘛！」
至於在台灣當紅的女歌手丁噹與「小胖」林育羣在主持的邀請下，在台上大唱高難度歌曲，鬥飆高音，令全場尖叫拍掌，氣氛高漲！
新城國語力頒獎禮 部分得獎名單
新城國語力歌曲
《等你愛我》陳奕迅
《因為愛情》陳奕迅、王菲
《全面通緝》潘瑋柏
《Is This All》吳建豪
《風無心》容祖兒
《3650》Twins
《傳奇》孫楠
《四度空間》LOLLIPOP F
熱播冠軍歌曲大獎
《脆弱》謝安琪
最受歡迎專輯
《MySecret》G.E.M.
年度歌曲
《好不容易》方大同
年度歌手
陳奕迅
年度專輯
《改變》張靚穎
新城國語力跳唱歌手
陳偉霆
新城國語力女歌手
丁噹／蔡卓妍／G.E.M.
新城國語力男歌手
潘瑋柏／吳建豪／方大同
全國最受歡迎歌手
曹格／張靚穎／蘇永康／容祖兒
全國最受歡迎組合
Twins／LOLLIPOP F
新城國語力亞洲歌手
謝安琪／許志安／孫楠
新城國語力亞洲樂團
蘇打綠
新城國語力亞洲搖滾歌手
黃貫中
新城國語力殿堂歌手大獎
黃韻玲
全球跳唱歌手大獎
羅志祥
全球至尊舞台大獎
羅志祥
全球最受歡迎至尊歌手大獎
容祖兒／陳奕迅
文：音樂組