張燊悅：我16歲離家出走
你的記憶中可曾擁有「瘋狂時刻」？就算斯文乖女亦有貪玩、反叛時候，已為人母的張燊悅透露她在少女時期曾離家出走，是她人生中最瘋狂的事件。
MARIA LUISA時裝騷
張燊悅：「大概16、17歲時試過離家出走，嗰次係除夕夜想玩到好夜，但媽咪唔畀，於是同佢嗌交，咁我就走咗去個朋友屋企半日，直到媽咪喊住咁嚟搵我，我先知道媽咪原來咁錫我。」
楊崢：「試過去馬爾代夫潛水，一條超過廿呎嘅魔鬼魚擦身而過，嗰刻覺得好震撼，同埋覺得人真係好渺小，所以要珍惜個人經驗。」
吳君如：「細個第一次去倫敦旅行，拎住幾千蚊，點知見到對二百英鎊嘅鞋，真係好鍾意，九十年代好興嗰個牌子架，點知買完無晒錢，於是投靠當地一個朋友仔，但佢只係學生無咩錢，借畀我住嗰間屋無水無電，真係覺得自己好慘囉，明明可以住酒店，但因為鍾意買嘢搞成咁囉，唉。」
慈善餐舞會
官恩娜：「我細個最瘋狂係同我哥哥一齊偷入隔籬屋嘅花園，跟住畀狗追，真係嚇死我哋呀﹗」
關禮傑：「以前十幾歲，同幾個男仔朋友一齊去咗個好偏僻嘅沙灘露營，大家會赤條條四圍跑同游水囉﹗」
鯨豚骨骼標本展記者會
貝安琪：「我最瘋狂係14歲穿脷環，媽咪知道後好嬲，十日無同我傾偈，不過第一次穿脷環穿得唔好失敗咗，兩個月後我再去穿過。」
徐靖雯：「我之前同前男友去咗東南亞旅行兩星期，去咗好多唔同地方，有時玩到凌晨四點，我覺得自己玩得好瘋狂。」
Lenovo活動
楊梓瑤：「最瘋狂係今年使咗好多錢，花咗六位數字喺屋企裝修、供細佬同自己讀書，一次清袋，依家好窮。」
黃浩然：「最瘋狂係生咗個仔，因為呢個決定係影響一世，要負起終生嘅責任，我都係考慮咗好耐先決定。」