孟瑤補擺喜酒新郎脷誘

【葉少文北京直擊】王晶一手發掘的「晶女郎」孟瑤,昨日七夕在北京與內地富二代老公周磊補擺喜酒,孟瑤穿上歐洲復古婚紗,手戴價值七位數鑽戒勁晒幸福,豪擲百萬、娶得嬌妻的新郎哥更情不自禁當眾伸脷舌吻老婆,錫番夠本!

孟瑤及周磊昨日舉行歐洲童話式婚禮,於北京國貿大酒店筵開六十席,一對新人昨午見傳媒,合交杯及切結婚蛋糕,孟瑤甜絲絲說:「我同老公08年結婚,老公當日冇求婚、冇擺酒,淨係註冊,我覺得應向父母有番個交代,所以補擺酒。冇特別揀七夕,咁啱師傅話好日。婚禮籌備咗三個月,老公話雖然超出預算好多,但我鍾意就得。(婚後專心湊仔?)囝囝周天澤九個月大,未識企,未識講『媽咪』,但影相好識擺甫士。我為電影付出好多努力,唔想放棄,但係咪性感就要問老公。」周磊則說:「孟瑤真人很有頭腦、有思想,她說給我一百分,我給她二百分!」說罷應傳媒要求親吻新娘,周磊起初只是蜻蜓點水,突然一手將嬌妻摟入懷並伸脷舌吻,熱情令孟瑤嚇了一跳。

一家三口打手印

一對新人昨晚乘坐馬車出場,婚禮上孟瑤向奶奶斟茶,獲贈鑽石頸鏈,孟媽媽則送了一座金觀音給周磊。當王晶致辭時,孟瑤激動落淚,她說:「晶哥好錫我,我問准咗屋企人可唔可以攬呢個男人,都問咗王子涵介唔介意我叫王晶做『爸爸』。」孟瑤婚禮上獻唱自己作的情歌,老公拎着一束玫瑰上台求婚,之後與囝囝一家三口打手印,但囝囝哭訴要媽媽抱抱。

王晶笑言心情像嫁女:「開心見到孟瑤有幸福婚姻,我哋仲有兩年幾約,關係太好,只要有啱佢角色,佢又肯,會再合作。孟瑤做咗媽媽更成熟、體貼。

陳爽獲介紹筍盤

陳爽和趙彤則有份擔任姊妹,陳爽表示跟任職銀行的男友蜜運半年,還爆孟瑤仍介紹男仔給她認識,暫未打算結婚,會先兼顧航空公司銷售經理及無綫的工作。