祖藍惡搞劉子千口擘擘

向來愛扮鬼扮馬的王祖藍，眼見劉子千《唸你》紅遍中港台，MV在YouTube點擊率高達三百多萬，為追趕熱潮，祖藍自編自導自演《唸你》惡搞版MV《DadDy》，MV中祖藍將子千的娘爆橋段及藝術唱腔照辦煮碗，先學子千無厘頭鋸扒，再模仿對方口擘擘、頭岳岳兼眼眨眨的浮誇表情演繹歌曲；為加強惡搞元素，祖藍找來騎呢阿叔反串扮演女主角鬼鬼，及將MV中的娘爆花束變成更娘爆的盆栽，極度爆笑。

惡搞歌詞極爆笑

至於由祖藍親自執筆的惡搞歌詞，則寸爆劉家昌拍攝「恐怖MV」，以及拿劉家昌為兒子太紅一事公開道歉作笑柄，啜核歌詞節錄如下：「我的字典裏沒有Daddy，不用說對不起，我從不拍恐怖的MV，MV裏全是你。」、「多得你我紅過頭，多得你多了人氣，你做甚麼我都愛你，Daddy！」

元素加入演嘢會

記者致電祖藍問如此惡搞怕否觸怒劉家昌父子時，祖藍即笑謂：「最緊要佢哋兩個感情好。」祖藍又指之前他在福祿壽節目中獻唱《唸你》的一段，放上網短短4、5天已有廿多萬點擊率，足證子千「叫座力」，才決定將子千加入稍後舉行的《王祖藍咪咁扮嘢演嘢會II》中作搞笑元素，他說：「有一part我會扮港男唱《唸你》，呢個MV係前奏，希望各位熱愛《唸你》嘅朋友睇得開懷。」

文：影視組