(5)朱晨麗淚眼搶灘 (3)許亦妮猛人撐

今晚《2011香港小姐競選決賽》將於電視城正式舉行，十四位候選佳麗爭奪冠、亞、季、最上鏡小姐及國際親善小姐五項榮銜，共四百四十萬港元的獎金獎品。賽前已有幾名佳麗率先跑出，大熱(5)朱晨麗之前已奪兩獎，(3)許亦妮靠是非及緋聞搶鏡，(13)蔡慧欣昨日當旺被抽中試戴后冠，口才了得的短髮(11)劉思希亦不容忽視！

昨日有爆料者指許亦妮曾表示認識財經界猛人，對方已跟眾評判要求「識做啲」，目標是推她登頂封后，似有造馬之嫌！對此，無綫外事部副總監曾醒明表示有機制：「即使個別評判畀好高分都唔會有一面倒情況，加上評判個個喺社會上都有地位，唔擔心造馬！」

否認傳聞覺得啖笑

許亦妮昨日亦一一否認負面新聞，對於被指做第三者，她認為太戲劇性，的確曾有J字頭的男友，但沒有做小三：「冇需要，有咁多好（男）人！之前亦冇男友一腳踏兩船。（有情敵？）咁又唔知喇！」她亦否認曾向人借十萬元：「唔識呢班人！（有訊息證明！）自己整都得！有真憑實據就拎出嚟，我都想知咩人！（咁多衰嘢？）唔知啲人咩用心！」她表示不擔心賽果受影響，心情沒有不快，只覺得啖笑。

被視為大熱的朱晨麗容光煥發表示每一part都有信心，雖然內心緊張，但會保持淡定，但突然眼濕濕表示不捨得其他佳麗，實行以淚功搶鏡：「相處咗咁耐！又一齊努力，有感情。（驚佢哋輸？）只係想做好個騷！」

許亦妮對於負面新聞表示得啖笑，不擔心會被扣分。 強：後台強悍 弱：是非累事 贏面：★★★★

港姐今晚終極戰 14位佳麗昨日泳衣綵排，鬥擺甫士爭艷。

蔡慧欣抽中戴后冠

因啜仔照片流出而喪喊的蔡慧欣昨日被抽中試戴后冠，她直言：「感到信心增強，人都靚咗。」但口窒窒的她之後又說只得少少信心，問到若真的贏出會否再喊？她說：「可能開心到喊！哎呀！唔想諗！」

同屬「黑馬」的劉思希，除昨日狀態大勇外，她亦得上屆冠軍陳庭欣大讚身形好、口才不錯，並被列為心水人選。另外，昨日網上投票五強依然是(5)朱晨麗、(3)許亦妮、(13)蔡慧欣、(7)胡中慧及(7)梁麗翹。　　

狀態大勇的劉思希隨時以半冷姿態跑出。 強：口才出眾 弱：冇話題性 贏面：★★★

(3)許亦妮（左起）、(5)朱晨麗、(6)梁麗翹、(7)胡中慧及(13)蔡慧欣在網上投票中領先。

文：影視組