Hidy打造港版安祖蓮娜
o靚模，就兩個字，靚但多口：奀的，瞓低；掂的，繼續露！但o靚模Hidy（余曉彤）卻流露着另一種截然不同的氣概，本可以輕易挺胸拗腰俘虜宅男，她卻偏要捨易行難，學功夫做打女，誓要變身港版安祖蓮娜祖莉！
Hidy與同門Jeana及大部分為一時口舌之快的o靚模不同，她說話比較深思熟慮，Hidy說：「我同Jeana好唔同，我做嘢會睇吓係咪fit自己嘅style，我份人好隨心，如果夾硬做唔fit自己嘅嘢，件事會好唔型。（唔怕人氣被搶？）你睇Jeana接嘅sexy戲、肉搏戲，就知我哋路線好唔同，我哋係點都唔會搶到對方嘅focus。（有得單飛出寫真，豁達咗？）其實新八模好多都默默耕耘，等緊一個機會，學跳舞、沙排、功夫、捽碟，未必樣樣都會曝光，我有冇幸運成分？我都有付出，但都清楚仲有好多不足之處，要去學習同改善。」
聲言不怕痛
正如Hidy在寫真集說：「模特兒不僅僅只有外表，還要有頭腦與內涵，才值得欣賞」，她說到做到：「我享受行show、影相、做model，拍戲都鍾意，早前拍齣打戲，撞傷打瘀算小事，我同意前輩楊盼盼話齋：唔跌唔會識，要學就唔可以下下錫住，我細個炒單車，下巴係咁流血都唔驚，平時潛水被水母『炸』、被珊瑚（界）到流血，由細到大都唔怕痛嘅，我希望可以學做打女，將來可以好似偶像安祖蓮娜祖莉咁，真係打得又睇得。」
文：陳奕龍 攝：劉智源