官恩娜自我安慰見紅好兆頭

Ella日前穿上酥胸半露的透視裝到網上電台宣傳新碟，她表示出碟當日在露天停車場舉行記者會，在半小時暴曬下，令皮膚變黑，幸好她已做足防曬才不致變「燒豬」。Ella自爆舉行記者會前發生流血意外，她說：「我心急落車，手㬹被車門損，流咗好多血，因為我趕住做記者會，所以只係用紙巾止血，好在冇影響到記者會。」

皮外傷唔睇醫生

問到突發性意外可有影響心情？她坦言初時很忟憎，幸好工作人員指流血是好意頭才心情平復。她謂：「工作人員話流血即係『見紅』，代表鴻運當頭。我諗吓，又係喎！心情即刻好番。」她自言是銅皮鐵骨，小小皮外傷不用看醫生。

Ella又謂今次新碟記者會成功，要鳴謝一班工作人員，尤其她的經理人，在烈日下工作半日後變成「燒豬」，頸及背脊的皮膚曬到紅又黑。為表謝意，她會無限量提供美白面膜給所有工作人員。

到大溪地拍特輯

另外，Ella稍後將飛抵出生地大溪地拍攝旅遊特輯，初時她想過帶同母親同行，可順道和住在當地的表哥、叔叔等親戚見面，但當她收到行程表即改變主意。她說：「行程好緊密，兩個星期要走勻所有景點，我唔想媽咪咁辛苦，都係下次先。」

文：音樂組