吳彥祖喪食增磅 嚇壞老婆
型男吳彥祖早前為電影犧牲fit爆身形，增磅上陣，日日喪食連老婆都大感驚訝；同片的古天樂則電影一部接一部，但風光背後總有辛酸，不是令身體受盡皮肉之苦，便是不停接受特技訓練，令他瘦了十幾磅。
吳彥祖（Daniel）與古天樂兩大型男早前再為爾冬陞添食， 演出他監製的《竊聽風雲2》，與劉青雲一同鬥戲。在新片飾演奸角的Daniel甘願作出犧牲，把靚絕的身形增肥廿幾磅，Daniel自爆當時一日食五餐，連老婆Lisa S.都被嚇親：「佢有晚返到屋企見到我喺床度又食雪糕同薯片都問我係咪傻咗。其實我食完仲要每日做三個鐘gym，大隻到連青雲都話我man咗，無晒稚氣。」他又笑言自己未曾試過有175磅，故家中只有兩條褲是合身。
壓迫感強
至於古天樂在拍攝《竊聽風雲2》時亦有難忘的一幕，他說：「嗰場戲講我同Daniel喺窄巷打架（上圖），試位時冇問題，到正式拍攝時出現誤差，Daniel將我隻手擦落石屎牆度，皮都甩埋，Daniel都好唔好意思。」
《竊2》煞科已一段日子，古仔尚未看過整齣作品，但已開始賣花讚花香，他笑言做後期配音時看過部分片段，節奏比上集更緊湊，壓迫感更強。
童年陰影
古仔將會為新戲《忠烈楊家將》接受騎馬訓練，他表示要控制馬匹並非易事，夾到大髀內側劇痛兼激瘦十幾磅，他因而憶起兒時一樁小意外：「兩、三歲時爸爸帶我去騎馬，點知畀隻馬拋咗落地，照X光個腦有瘀血，不過冇做手術，係時不時會踎低起身見頭暈，但十幾歲後就再冇呢個情況喇！」
吳彥祖
Styling: Harrylam
Make-up artist: Jane Leung
髮型：Vic Kwan@ii hair & nail
古天樂
Make-up artist: Carmen Man
Hairstyling: Dan Tam
劉青雲
Make-up: PuiPui
Hairstyling: JunHo@Suave
文：影視組