霆鋒片酬1,600萬超越栢芝
「鋒芝」鬧婚變，兩名兒子撫養權、家產分配有排計，不過霆鋒於片酬方面先贏栢芝一仗，早前奪得金像影帝的他，身價隨之而飆升，片酬已超過一千六百萬，比千五萬的栢芝吸金力更高！
謝霆鋒與張栢芝鬧婚變，兩名兒子Lucas及Quintus的撫養權有排搞，勝負尚未分曉，不過在影壇方面，霆鋒之片酬身價卻先贏一仗，因自霆鋒奪得影帝後，身價漲了不少，最近更超過一千六百萬，超越了栢芝的一千五百萬！
檔期或撞到正
雖然霆鋒加了片酬，但依然大把導演爭住搵，除了之前曾現身霆鋒公司的王晶、羅啟銳、張婉婷之外，據知，陳木勝、林超賢、彭氏兄弟都正斟洽霆鋒拍新戲，有傳袁和平也加入戰團，正力邀霆鋒拍攝電影《武當》，夥拍金城武、王力宏。
「鋒芝」除了在片酬「一爭長短」之外，兩人接演的電影也隨時撞到應，霆鋒主演之《逆戰》預計明年農曆新年檔上映（一月廿三日年初一），而栢芝正於寧波拍攝的《河東獅吼Ⅱ》則預計在情人節上畫（二月十四日），觀乎《逆戰》之氣勢，在內地上畫一個月不足為奇，兩人大有「撞頭」機會，「爭仔」之餘，仲要爭觀眾！
拍袁和平新戲
記者就霆鋒加片酬以及接拍袁和平新戲一事，致電霆鋒經理人霍汶希，她表示：「霆鋒確實加咗片酬，但加咗幾多係商業秘密唔方便透露，八爺（袁和平）兩年前已經搵霆鋒斟兩部戲，但就冇收過《武當》嘅劇本，好多謝八爺嘅賞識，都好想同八爺合作。（點睇《逆戰》同《河東獅吼Ⅱ》差啲撞到正？）百花齊放係好事嚟。」
另昨有消息指栢芝拍攝《河》片時經常無理曠工以及耍大牌呼喝工作人員，劇組全數否認，並指栢芝工作態度十分之好，更沒有無理曠工。
文：影視組