劉心悠怕烙印一世拒影肉照
劉心悠第三次任脫毛公司代言人，她坦言家中只有一件頭泳衣，保守的她笑言着比堅尼好似冇着衫，更抗拒o靚模影肉照，因為影咗會一世都跟實。
劉心悠（Annie）、蔣怡、梁漢文（梁炳）、羅仲謙等前晚出席海港城活動，穿上復古短裙現身的Annie透露最近忙於還廣告債，為脫毛公司再任代言人的她拒絕透露身價：「驚講咗出嚟以後就係嗰個價，但滿意酬勞，已經第三次代言，年年都有加碼，送咗好多嘢畀我，可以做全身脫毛。（比堅尼位都有脫？）冇，我好保守，唔着比堅尼。」她更直言覺得着比堅尼似冇着衫，自己只有一件頭泳衣，但表示若是拍廣告可以考慮。
對於o靚模行性感，Annie大感抗拒：「我自己接受唔到，如果我係佢哋男友一定阻止，呢啲相影咗就成世跟住佢哋，第時有女都唔會支持佢咁做！」
梁炳生仔隨緣
同場的梁炳剛從北京返港，大讚好友鄭中基（Ronald）生女「好勁」：「咁短時間可以做咁多事，唔知佢幾時開始拍拖，其實我都係到佢發聲明先知佢哋有小朋友。」他表示未有機會見到Ronald女兒，又笑說：「似佢就大件事，似媽咪係好事，替佢兩公婆開心都替Ronald爸媽開心，鄭東漢退休又可以抱孫，幾好。（你都努力造人？）啱啱結婚嗰陣好想有，耐咗冇咁渴望，呢啲嘢冇得逼，隨緣啦！」
而問到有冇跟謝霆鋒聯絡，梁炳表示最近不方便有太多聚會，霆鋒都不想：「唔知佢冇屋企返，唔清楚佢家事，希望快啲解決。」
文：專案組