阿Sa校服鬆身自嘲冇得鬥

Twins昨日舉行寫真集及新碟發布會，適逢寫真集在書展開鑼首日與一眾o靚模的性感寫真互撼，阿Sa自嘲：「邊有得鬥啫，佢哋咁噴血，我哋着校服鬆身咁多！（你哋sell純情？）唔係，係sell紀念冊。」至於為何欠缺性感泳照？阿嬌說：「寫真唔一定要着泳衣，可以有唔同感覺！」而阿Sa則表示：「其實以前着泳衣都好尷尬，喺朋友面前着梗係冇嘢，好多人睇住就尷尬！」

同男友見得少

剛由內地拍完劇返港的阿Sa，被拍得甫落機即踩上男友William位於九龍塘的寓所見面及過夜，阿Sa被追問時表示：「我見到記者影相都唔理，太冇時間喇！（有冇過夜？）唔話你知，都係做正常情侶做嘅嘢，食嘢、睇戲同傾偈，仲有幫佢執行李，佢要去蒙古拍戲，長途跋涉好慘，我都係喺側邊指點佢執！」阿Sa揚言自己剛回港，William卻要離港，她表示：「我返咗嚟兩日，都見唔足兩日，因為要做嘢，嚟緊至少一個月冇得見呀！」

阿嬌的中學老師杜小姐（左）大爆阿嬌中學時多人追求。

Twins獲英皇高層吳雨現身支持，在發布會上回顧她們的舊照。

生B要似阿嬌

對於前夫鄭中基指女兒不像自己，問阿Sa是否覺得好彩？她笑說：「你咩問題嚟o架？我今日唔夠瞓，要腦筋急轉彎！」阿嬌在身旁插嘴：「靚咪得囉！」後來阿Sa才說：「最好似媽咪嘅樣貌，似佢（鄭中基）嘅智慧同才華！」問阿Sa將來生仔是否要似自己？她竟然說：「似阿嬌最好，專家話佗BB時睇多啲靚嘢個BB都會靚啲o架！」阿嬌則無奈表示：「多謝晒，咁我曬多啲相畀你！」

文：音樂組