克勤個唱驚現靈異照
前晚李克勤演唱會驚現疑似長髮靈體，面青唇白兼嘴角流血，飄浮在舞台的不同角落，神出鬼沒，令人毛骨悚然！克勤看了相片後表現淡定，認為只是惡搞之作，還抵死地玩食字說：「不過整得鬼咁好睇！」
昨日本報收到讀者譚小姐報料，指前晚在克勤第三場演唱會上，用手機拍攝相片，返家用電腦睇相時，竟見到一個女子的巨型半身樣，長髮飄飄半遮眼，白臉白唇加埋白衫，兼且嘴角有血，好有鬼feel，有時出現有時失蹤，驚現不同角落，狀甚恐怖。
譚小姐謂她跟老公都分別用手機拍照，但自己部手機卻沒現女子樣，她說：「我都覺得好怪，現場睇唔到個女仔，我問老公係咪download咗啲軟件，佢話絕對冇，佢部手機亦冇呢個女仔樣，最奇怪係佢影咗十幾張相，但唔係張張都有呢個女仔出現，因為老公以前都見過鬼，唔知佢真係影到定手機有問題？」
「整得鬼咁好睇」
本報將相片轉交給克勤細看，他淡定說：「我唔相信係真嘅，可能有心人整出嚟贈興啫。」克勤還笑說：「演唱會啲飛已經賣晒，唔需要有呢啲嘢，不過佢都整得鬼咁好睇。」
雖然前晚個唱疑似現鬼，但沒影響克勤的演出，同是明星足球隊的梁漢文（Edmond）收工後捧場，克勤拉Edmond上台做嘉賓，讚對方是真正好波之人，二人大談當年合作拍劇集《廟街孖兄弟》的趣事，Edmond笑言小時候已很喜歡聽克勤的歌，兩人還合唱當年Edmond參加新秀時演繹的《深深深》。
文：音樂組