霆鋒難忘高人指路 忌車腦交戰
謝霆鋒拍戲出名搏晒命，不過亦非「百無禁忌」，最近就有一部關於賽車的電影斟霆鋒接拍，角色相當吸引，可是名風水師陳伯生前曾叮囑霆鋒不要揸車，為此霆鋒接與不接，陷入兩難之間。
謝霆鋒銅皮鐵骨，向來捱得，不過「鐵人」都會有忌諱事，霆鋒顧忌的就是「車」，因當年英皇御用風水師陳伯，曾向霆鋒贈言，直指「車」不利霆鋒，叫霆鋒少掂為妙。事實自年前「頂包」事件之後，霆鋒已極少揸車。
日前，彭氏兄弟籌備開拍寰宇一部新片，題材講賽車，電影公司欲找霆鋒與郭富城兩位影帝合作，同飾賽車手，女主角則計劃邀氣質女星周迅、桂綸鎂或江若琳演出，由於角色頗具挑戰性，令霆鋒躍躍欲試，但礙於當年陳伯之言，使霆鋒內心交戰。
王晶上樓密斟
未知接拍賽車電影與否，大概霆鋒暫時只能寄情賽車遊戲。近日在家閉關的霆鋒，據知一直靠叫外賣醫肚，幸得到一班朋友如司機、助手表哥、伍允龍、劉浩龍輪流相陪，睇碟兼打機減壓，才不致在家中呆爆。
而霆鋒昨日終再度「出關」返銅鑼灣公司，約下午二時許，身穿T恤牛仔褲、戴上黑超、頸掛金珠仔金鏈的霆鋒離開金鐘柏舍，並應記者要求停低影相，之後坐車抵達銅鑼灣公司，傳媒們即飛奔上前影相，霆鋒見狀即笑言：「你哋再跟我，會短幾年命。」還跟記者說，要好耐先收工，霆鋒助手表哥更補充：「通宵呀！」霆鋒說話時聲沙沙，但他否認身體不適。霆鋒入𨋢前，亦不忘跟傳媒揮一揮手。
約四時許，導演王晶出現，擺明搵霆鋒的他，卻說自己不一定要找霆鋒，但入𨋢後卻問記者霆鋒公司在幾多樓，十分搞笑。王晶逗留約四十五分鐘之後離開，記者問是否跟霆鋒傾新戲的事？他說：「我哋成日傾㗎啦，未定呀，未講得住。（幾時開拍？）有期咪拍囉！（霆鋒心情如何？）幾開心，表哥生日，同佢切完蛋糕食埋先落番嚟。」
英皇要睇檔期
對於寰宇斟拍賽車戲一事，霆鋒經理人霍汶希說：「的確傾緊，要睇有冇檔期拍。（係咪陳伯叫過霆鋒唔好掂車？）傳聞嚟啫！主要睇檔期。」寰宇電影高層林小強則說：「套戲仲籌備緊，唔方便講住。」
採訪：影視組、音樂組