台上玩自拍 阿倫第一次獻畀克勤
李克勤跟香港小交響樂團演唱會前晚舉行第二場，捧場嘉賓有他的好拍檔校長譚詠麟、周慧敏、王馨平、羅蘭、彭健新等，校長邊欣賞邊為克勤拍照並立即放上微博，當克勤從觀眾席邀阿倫上台做嘉賓時，全場起哄。
近年沉迷玩微博的阿倫，一上到台就笑言阻觀眾少少時間，即攞住手機跟克勤背對觀眾玩自拍，全場爆笑，阿倫昨日在微博留言：「呢生人我都係第一次現場台上拍照。」
笑指揮當小炒
阿倫在台上大搞爛gag，以多功能演唱會來形容克勤這個騷，他笑言非常抵睇，看見克勤舞台地板上放了巨型電子螢幕，他指住笑說：「呢個係本世紀最偉大發明。」克勤笑言以前不用，跟校長做演唱會才開始用，阿倫即笑說：「咁咪踏上成功第一步，嗰啲冇乜hit歌嘅歌手，得嗰十幾隻歌，係啲有五十、六十首經典歌嘅歌手，邊記得晒咁多歌。」
演唱會上克勤穿上桃紫色長褸出場，阿倫大讚好靚，但就乘機借「son of the peach」玩粗口諧音，克勤連忙制止笑說：「有好多我個仔嘅同學仔家長喺度o架。」阿倫自言第一次欣賞葉詠詩指揮樂團的演出，但就以「小炒」形容葉詠詩指揮時動作，他笑說：「喺廚房小炒都上得台。」笑爆全場，最後兩人合唱一曲《一生中最愛》。
文：音樂組