郭羨妮延婚期小島秘密行禮
郭羨妮與內地武指朱少杰於內地拍劇而撻着，二人愛得激烈並速訂終身，Sonija出席北京時裝騷時，宣布本年底結婚，據知婚紗禮服亦由好友何國鉦包辦，不過「喜事」多磨，據知二人的婚期有變。
記者日前向何國鉦了解，他指Sonija遲遲未來度身，婚紗設計圖尚未成形，估計要年底完婚甚有難度，他說：「係呀！Sonija都未同我傾婚紗嘅事，話要遲啲，其實佢好低調，我估佢有自己嘅計劃。（係咪明年？）今年點都趕唔切，明年嘅話我都可以配合嘅！」
拒無綫好意
Sonija自傳出婚訊大晒幸福而惹來不少網民揶揄，難怪今次婚事要如此低調保密。據知身為無綫「親生女」的她不惜婉拒娘家建議於北京舉行盛大婚禮，改為到小島完婚，為避開傳媒耳目，更揀選了一間服務外籍人士的婚禮籌劃公司代勞，而獲邀觀禮的亦只限至親。不過考慮到要向夫家北京親友交代，故Sonija只好之後再另行設宴。
對於無綫提議北京婚禮一事，外事部副總監曾醒明表示不清楚，但一切都會尊重Sonija個人意願。
文：影視組