古巨基8千萬簽3年睇齊霆鋒
古巨基以天王價8千萬提早與英皇續約3年，跟同公司的謝霆鋒身價睇齊，拍住上雄霸歌影壇。據知，吸金王基仔短短2年已勁賺逾8千萬，堪稱逆市中的奇葩！基仔將於10月強勢攻紅館，全力搶灘誓要4奪「最受歡迎男歌星」，創造個人歷史紀錄！
自基仔於09年加盟英皇後，短短2年出碟、拍劇、廣告及商演等排山倒海的工作，已瘋狂吸金逾8千萬，成績驕人。據知，基仔雖然還有年多才約滿，但英皇為了肥水不流別人田，箍實會生金蛋的基仔，早前已急不及待跟他傾談續約。
誓4奪最受歡迎男歌星
由於唱片市道長年不景氣，各大唱片公司對有賺錢能力的歌手更加虎視眈眈，身為3連霸「最受歡迎男歌星」的基仔，更加理所當然成為力爭目標。據可靠消息透露，英皇為挽留基仔，豪擲天王價8千萬續約3年，跟早前以3億續約8年的霆鋒睇齊，兩人平起平坐。據知，英皇還承諾全力幫基仔成為4連霸「最受歡迎男歌星」，追平樂壇校長譚詠麟四度封王的紀錄。
雖然樂壇頒獎禮還有5個多月才揭開戰幕，但各大唱片公司已部署為旗下歌手全力爭獎，其中鬥得最激烈的「最受歡迎男／女歌星」獎項，由於四大唱片跟無綫的版稅問題仍未解決，而基仔的最大競爭對手陳奕迅，至今仍未知能否有機會決一死戰，依目前走勢，基仔大有機會坐定粒六4度封王。
本報向英皇唱片及藝人管理部總監霍汶希求證，她承認成功冧掂基仔續約：「基仔加盟之後幫公司賺好多錢，又攞到好多獎。之前佢腰骨有事，都肯坐長途車返內地做嘢，所以老闆（楊受成）好錫佢，遲啲會開電影畀佢做男主角，最少投資3,000萬拍攝，搵郭子健執導。」
千萬打造10月紅館騷
霍汶希又稱：「嚟緊10月仲會幫基仔開演唱會，呢個係佢加盟英皇之後第一個紅館騷，公司會投資千萬製作費，不惜工本都要幫佢打響頭炮。」基仔將於10月7日起假紅館舉行《古巨基 Amazing World 世界巡迴演唱會2011》，他親自構思以「Amazing World」為概念，將紅館變做主題樂園。唱片公司更特別請了林海峰和攝影師夏永康聯手打造個唱海報，化身白馬王子look的基仔令歌迷耳目一新。
文：音樂組