Elaine出3D寫真立體陪瞓

o靚模寫真戰進入倒數階段,一日未開戰都有新血加入。來自澳門的「翻版吳佩慈」Elaine Wong決定向眾模下戰書,推出全港首創3D寫真,成本高達四十多萬,誓要晚晚立體陪宅男瞓!

今年後起o靚模星羅棋布,近日又多一位來自澳門的o靚模Elaine Wong。擁D Cup上圍的她首次登場就噱頭十足,推出全港首創3D寫真《That's me Elaine》,寫真於澳門拍攝,成本高達四十多萬,特別以日薪四萬請來《阿凡達》幕後班底Henry Chung拍攝,隨書會附送3D眼鏡。Elaine笑言宅男可邊戴住3D眼鏡邊攬住其寫真入夢:「我試過睇個效果好立體,啲相好玲瓏浮凸,好似可以用手掂到咁!」

預咗蝕錢

率先曝光的寫真造型中,有Elaine用花灑自淋濕身性感相,亦有高貴Bling Bling裙,更有Elaine僅以雙手遮住兩點的大膽照;本身是Lady GaGa粉絲的她於寫真亦有幾個造型倣效GaGa。

寫真會印約四、五千本,Elaine坦言不擔心銷量:「因為朋友會幫手買晒!其實公司計過條數起碼要賣三萬本以上先有得賺,預咗蝕,志在畀多啲新嘢粉絲睇。本寫真3D加埋自己本身3D,共有6D,殺晒!」出完寫真她希望專注拍電影,拍三級文藝片都無所謂,只要緊守三點不露。文:專案組