佘詩曼選婚紗簡單美

名模姬摩絲早前終於覓得有情人共諧連理，其婚禮規模及嫁衣即成為全球女士的話題。其實每個女仔心目中都有件理想的嫁衣，佘詩曼說只需要款式簡單，直言不會性感，因怕未來老公不喜歡。

佘詩曼：想結婚時着Valentino嘅婚紗，始終婚紗都係簡單啲好啲，況且以往拍劇拍廣告已經成日着，同埋婚紗唔使咁性感，我驚未來老公唔高興。

陳嘉桓：我會搵Dorian（何國鉦）幫我設計，我行騷時成日着佢啲婚紗，好鍾意佢嘅設計。我想我件婚紗要特別兼獨一無二，上面要加啲粉紅色嘅Rose，要有條好長好長嘅拖尾，我喺禮堂行禮時所有賓客都可以睇得到。新郎件禮服後面嘅燕子尾都一樣有拖尾設計，咁我同佢就好襯喇。

傅穎：我想自己設計件婚紗，因為我好鍾意設計，同埋自己會最清楚自己鍾意啲咩款式，我希望件婚紗係一世只會着一次。我心目中嘅款式係全白色嘅紗裙，有好多層紗，要修腰cutting，下身就係散開嘅傘裙。

趙嘉懿：之前結婚我係着品牌cocon嘅婚紗，佢啲casual wear好靚，估唔到婚紗都一樣咁靚，因為夠型同簡單，加上我腳唔長，着短裙款式最啱。

戴小奕：我鍾意款式傳統嘅婚紗，始終我係中國人，如果加入中國特色例如旗袍呢啲元素，會更加突出傳統嘅味道。

陳見飛：我十二月結婚，本來想揀好喜歡嘅品牌Marchesa，但因為last minute先揀婚紗，加上香港冇貨又搵唔到，所以最後揀咗Vera Wang。我認為婚紗唔需要性感，我有身材着咩都可以騷到，哈哈！

胡蓓蔚：當年我結婚係冇着婚紗，只係着一件evening dress，我夢想嘅婚紗係Vera Wang設計，簡單就OK，我唔鍾意太浮誇、類似cupcake嘅婚紗。