Eason捧新人幾舊水搞掂
陳奕迅（Eason）三度續約環球唱片，簽約記者會上獲封「公爵」，並宣布開製作公司捧新人兼設個人網頁，不過問到投資多少時，Eason搞笑說：「做幾個原子印，幾舊水就得啦。」
Eason決定留效環球，昨日唱片公司特別舉行簽約記者會，為隆重其事用Eason至愛的英倫風，黑色英式西裝打扮的Eason，由四位「御林軍」伴着進場，並大玩英式皇室封爵儀式，由營運總監Max Hole及大中華區董事總經理Sunny Chang給Eason頒贈權杖及勳章，將Eason封為「環球公爵」，拿着權杖的Eason笑言似差利卓別靈，更模仿「差利」舞士的扑自己頭，引得全場大笑。之後Eason聯同經理人陳家瑛及唱片公司高層進行簽約儀式。
否認過億續約
一直有傳Eason身價過億，Eason坦言：「依家賣碟邊會係主要收入來源，所以歌手同唱片公司係『冇億』嘅，拍戲同做騷就有益。（咁續約有冇億？）係商業秘密，總之唔會係天文數字，係滿意同合理價。（續約因為做生不如做熟？）我真係唔係咁鍾意變嘅！」
Eason除宣布7.27生日當天其個人網頁「神經研究所」啟動外，他投資的製作公司亦籌備當中，他謂：「見身邊朋友霆鋒、吳彥祖、馮德倫都有自己製作公司，自己都想為樂壇貢獻吓，會簽新人，做歌或者電影，而今次新合約會配合埋新公司一齊做。」
問到榮升老闆的Eason投資多少？他笑謂：「唔知喎，開間公司咪做幾個原子印，幾舊水就得啦，得閒開下Check簽下名，我冇諗過要賺錢喎。」
文：音樂組