拉姑嘆鋒芝：緣盡冇得救

一直在背後默默支持兒子的拉姑，待霆鋒返港處理家事後，她於前晚開腔接受本報專訪，剖白她跟霆鋒的母子情，跟栢芝的婆媳關係，還有對3個多月未見一面孫兒的牽掛，身心俱疲的她，昨日跟老公鬍鬚Kong飛新加坡檢查身體，不插手干涉兒媳婚姻。

記：記者　　　拉姑：狄波拉

霆鋒頂唔順投奔阿媽

（鋒芝5年婚姻走到盡頭，拉姑親口道出兩人婚變內幕，緣盡冇人救得到！）

記：對鋒芝婚姻仲有冇期望？

拉姑（平和地）：我都冇參與，唔係知好多嘢，我成日以為霆鋒唔出聲就有得掹，後來才知有律師搞，之前佢哋爆咗單大鑊嘢，當日佢兩個鬧交嘈得好犀利，栢芝揸車出去，點知發生交通意外撞到阿伯，後來阿仔嚟咗我屋企，我同佢講：「阿仔，你要返屋企。」霆鋒話：「我真係頂唔順，如果我返屋企，頂唔到真係要返嚟。」我話：「你再嚟都要返屋企。」

（嘆氣）呢啲係天意安排，甚至栢芝揸車撞到人，呢啲就係天意，個天要stop你，到咁地步我都冇辦法，惟有順應天意，佢哋兩個成年人，我唔會干涉、參與，緣盡冇人救得到，但可以處理得好，佢兩個一個係我仔，一個係我新抱，有父就有母，希望佢哋健康環境快樂生活。

拉姑邊行邊看本報有關鋒芝新聞，可見十分關心兩人。

放開懷抱的拉姑，與丈夫同赴新加坡檢查身體，趁機輕鬆一下。

想見乖孫事先申請

（Lucas和Quintus是拉姑的心頭肉，但原來拉姑想見兩個孫，卻要向「人」申請！）

記：幾耐冇見一對孫？

拉姑（語氣沉痛）：4月到依家冇見過，阿嫲同孫玩、過生日，都要申請，打電話問可唔可以同孫（Quintus）做生日？當時知道霆鋒同栢芝關係鬧得好差，阿仔話遲吓先，或者等佢哋大個啲先！唉！或者到時我唔知死咗未？

記：有報道Lucas 8月讀書？

拉姑：我乜都唔知架，不過佢哋有需要就透過司機、工人，話畀我知佢哋需要乜嘢，我唔覺呢樣唔好，唔會諗你哋有事鍾無艷，我會諗幾好喎，我都有啲用。

記：點解唔跟仔仔去陽明山莊見孫？

拉姑：我覺得唔好好似配合你哋寫嘅畫面，話我同霆鋒去搶仔，唔好用個搶字，話我係幕後黑手，黑乜嘢手？我覺得我嗰隻同情心嘅手，邊個埋嚟都覺得溫暖，我連佢搬屋都唔知，4月孫嚟我屋企，我話夜啦走啦，你哋住好遠，點知賓妹話依家住得好近，5分鐘車程，咁我先知。

拉姑從不干涉栢芝的生活，婆媳本來就沒有拗撬。

拉姑痛錫兩個乖孫，可惜想見一面亦要事先申請。

從不干預新抱天地

（當年鋒芝瞞住拉姑結婚，一直有傳拉姑唔鍾意栢芝，拉姑澄清從來冇跟栢芝吵架，亦從冇差隻腳踩入新抱的天地。）

記：幾耐冇見栢芝？

拉姑（提高聲線）：嘩！耐囉！大家都知佢呢半年特別忙啦，唉！佢哋兩個大人嚟，忙架嘛，點解要佢哋得閒嚟報到、斟茶做乜嘢，好多嘢都係出面街外人話我知，你個孫又去咗北京，咁樣囉。

Lucas幾個月嘅時候，啲人話我孫好得意，可唔可以畀啲孫相，我話問佢媽咪攞，嗰個唔係我財產，所以我唔會去佢哋屋企架，因為我覺得係新抱嘅天地，每一個女主人都有每一個女主人嘅方法，我以為我咁做係啱嘅，留番個天下畀佢，不過婆媳、婆媳個個都話難做架啦，我從來冇同佢拗撬過，從來都冇，只有佢話：「唔好意思奶奶，打親畀你都係有事。」我就會答：「唔緊要唔緊要，你講啦新抱仔，你講得到我就一定做到。」

愛兒回歸　放心離港

（拉姑只有霆鋒一個兒子，愛子情深的她一直在背後默默支持，寧願自己受委屈都不想為霆鋒添煩亂。）

記：霆鋒返嚟有冇見面？

拉姑：我哋大件事才聯絡，霆鋒昨日返嚟打畀我，我同佢講：「你落飛機，阿媽要走啦，媽咪喺度會添煩添亂，有更多謠傳，點解我8號唔走，阿媽知道8號機場好多記者，阿媽怕喺機場碰到你、碰到你太太，外間會有傳言，以為我有份參與，咁會令你哋好麻煩。

我話你聽，做仔唔會成日嗲阿媽，佢16歲入行，出入都有幾十人跟佢，我做媽咪留喺仔後面，每有大鑊嘢發生就一齊面對，我10幾年冇去佢屋企，因為咁，新抱、外邊人以為我哋關係有問題。

記：你對霆鋒有乜寄語？

拉姑（感慨）：佢生命中有好多個關，呢個關唔止係佢，仲有佢太太，有佢兩個仔，要負起做人應該要負嘅責任，唔係人哋話我係幕後黑手去插手，根本唔係，霆鋒係最COOL，講乜都唔會聽，佢有自己一套。

內心滴血 「濫藥」難眠

（驚爆鋒芝婚變後，外間不實傳言指拉姑放料插新抱，啞子吃黃連的拉姑，每晚要食3粒安眠藥才能入睡，眼淚心裏流，但訪問好平和、冷靜，冇喊。）　

記：依家心情點？

拉姑（痛苦）：前排心情麻麻哋，因為啲嘢突如其來，自己好震驚，依家我選擇離開香港，我真係需要瞓覺，呢幾個月身體愈嚟愈差，以前一粒安眠藥可以瞓一晚，依家3小時要食一粒，日日坐車出去都轉三次車避記者。

我需要休息，唔好再畀人覺得我係背後黑手、放料，我呢個阿媽，連佢請邊個律師我都唔知，我冇見個仔，唔會參與搵邊個律師、係咪離婚，亦冇去過馬來西亞，我啲眼淚流乾咗，阿仔返嚟我安樂，唔使再掛心。

記：外間對鋒芝婚變跌眼鏡，慾照事件咁大難關都可跨過，但機艙自拍卻引爆婚變導火線？

拉姑（慨嘆）：真係諗唔到，其實呢件事比當初難關算乜風波，儘管我飽受好多委屈，但有時都安慰，有日同老公去食麵，有幾位客人同我打招呼：「拉姑，撐住冇事，你有兩個孫。」令我感動到喊。

文：音樂組　攝：追蹤組