惠英紅屎上最強膝傷留疤
惠英紅為拍戲再添終身疤痕，更要瞓身牛屎堆中搞到周身臭，幸而獲「史上最強」甄子丹大讚身手了得，直言覺得這位師姐寶刀未老。
小紅於陳可辛新片《武俠》內大展身手，其中一場與子丹對打、飛簷走壁的戲令人拍案叫絕，不過子丹助手事前往視察環境時，差點身首異處。小紅談起拍攝情況仍猶有餘悸，說：「佢哋想我死得悲壯啲，所以除咗同子丹追逐之外，仲有場戲講我走入牛棚，畀啲牛撞同踩死。拍嗰時啲牛失控，牛角撞到我啲肋骨，痛到我叫救命，事後仲畀朋友鬧，話我乜都夠膽死。」
因為要趕返港拍另一組戲，小紅「與牛搏鬥」後，弄到滿身牛屎味卻來不及洗澡，便要衝往機場趕飛機：「當時好尷尬，成身好唔舒服，又覺得旁邊啲人投以奇異眼光，印象難忘。」
打多幾十年
由於拍攝現場海拔高達二千八百多呎，第一天埋位與子丹對打後，小紅感覺天旋地轉，子丹卻笑指她寶刀未老，應該可「再打多幾十年」，令她不禁翻白眼。
小紅談到今次的「辛酸史」：「有場戲傷到膝蓋一帶，傷口見骨，我只係喺現場做咗簡單嘅治療，由於處理失當，一度發炎流膿，所以最終傷口留疤，最嚴重時化妝都遮唔到，依家返嚟做咗四次彩光，都發現唔能夠磨平，我依家每次見到陳可辛，都會同佢講，呢條疤係佢賜畀我嘅。（加片酬？）醫藥費都冇畀呀，哈哈！」
化妝：Louie suk bing Angel
髮型：Mok Shuk Yee
場地：Harlan's Bar and Restaurant
文：影視組