王梓軒日本起癮養顏靠滾
唱作歌手王梓軒（Jonathan）剛到日本宣傳，當地的牛內臟火鍋已榮升他的近期最愛！日前他便與薛家燕邊打邊爐邊做節目，除了大讚火鍋湯底特別外，Jonathan更直言當日在家燕姐身上學到不少。
王梓軒剛從日本宣傳日文單曲回來，他自爆此行愛上當地的牛內臟火鍋：「人哋話係養顏，係我呢期嘅最愛，依家去親日本做嘢都要去搵嚟食，好鍾意！」日前他便聯同家燕姐到火鍋館打邊爐，二人不約而同大讚火鍋湯底特別，Jonathan說：「三文魚湯底好得意，有蛋白同三文魚，煲滾後外層會變咗梳乎里咁，食落去口感似陣風，好好味，個廚師仲話好養顏添！」
驚嘆主持功力
家燕姐也表示喜歡打邊爐，但大熱天時既擔心燥熱，又怕沒有胃口，幸好當日品嘗另一款的海鮮喇沙湯底開胃又不太辣，最重要是不肥膩，對注重健康的她來說十分適合。
Jonathan自言十分敬重家燕姐，又謂當日在家燕姐身上學到不少東西：「因為嗰日係做電台節目，聽眾睇唔到啲食物，只可憑我哋把口去形容，我喺隔籬聽到家燕姐嘅形容都好想食！原來除咗講味道，仲可以形容質感同口感等等，家燕姐真係好叻！」
文：音樂組