李家鼎怒插思琦 「最醒一哭二鬧三上吊」
楊思琦在《東張西望》中哭訴心聲，還暗示李泳豪未能照顧到她，才忍心揮別九年情。身為泳豪父親的李家鼎對於思琦的指摘怒不可遏，還爆粗逐點反擊。他說：「佢話2、3月有共識都多×餘，佢當時仲過嚟我屋企同隻狗玩，又嚟同我哋食飯；5月豪仔生日，佢都有嚟！我夠膽講佢哋當時百分之二百冇分手。因為上個月26日仲過嚟片場搵豪仔，一直陪豪仔到食消夜，仲話佢畀錢；佢第二晚又再嚟，如果佢哋一早有共識分手，我仲同佢食飯咩？當我傻o架？」
對於思琦在訪問中哭得梨花帶雨，強調想搵一個照顧到她的人，鼎爺即反駁：「佢最叻係乜呀？佢最叻就係標眼淚，最醒就係一哭二鬧三上吊。佢唔係搵照顧到佢嘅人咩？又搵多個，搵埋第三個呀？講×埋啲廢話！」問到泳豪現在的情況？他說：「我日日都陪住佢、安慰佢。佢初戀就拍咗9年拖，咁就分手，個人梗係晃吓晃吓啦，我唔畀佢揸車o架，費事大吉利是。」對於思琦表示會請假九個月，鼎爺說：「佢想點就點，唔×關我事！」