霆鋒淡定唔使護駕

在馬國已逗留逾兩個月的霆鋒，因要日夜顛倒拍戲分身不暇，已足足有近兩個月冇見過一對兒子，不過，霆鋒並未將心肝椗置諸腦後，反而幾經辛苦，於5月13日Quintus一歲生日那天頻撲返港慶祝；直至今天，《逆戰》終於埋尾了，雖然霆鋒仍要徹夜趕拍，但為了心急見一對兒子，他寧願犧牲睡眠時間，早已訂妥機票明天搭早機返港，預計下午1時許就能抵港，爭取時間跟兒子相聚。

大方面對唔使鬼祟

消息指，霆鋒會在馬國乘搭直航機，大方地由香港機場登陸，不會輾轉迴避記者，相比起張栢芝千方百計避記者，表現得更有大將之風，事關上次栢芝飛米蘭，刻意走2號登機大樓，還安排大批保安護駕，返港時更有警察和50名保安阻攔，連去寧波拍戲，都刻意由廣州出發避過記者追訪。據知，霆鋒覺得自己行得正企得正，故沒打算要鬼祟返港，甚至拒絕英皇請保安維持秩序的要求。　

由於霆鋒返港消息曝光，估計會有半百傳媒湧到機場採訪，據知，英皇為了安全起見，本安排大批保安到場維持秩序，不過，卻被霆鋒拒絕了，經理人霍汶希說：「霆鋒話唔需要避記者，唔使搵保安咁巴閉，佢同香港記者識咗咁多年，相信大家有秩序，所以公司只會派幾位同事接機。」

拍廣告出慈善活動

雖然霆鋒返港處理家事，但據知他會封嘴拒談，事關霆鋒早前在北京剖白後，要交代的已交代了，他會靜待事件有了結果才公布。返港後，霆鋒於9日就開工拍攝手錶廣告，如果栢芝要找他攤牌，就只有短短黃金12小時可善用，據知，霆鋒會靜待栢芝出招，希望大家平心靜氣解決問題。

霆鋒返港除接拍廣告外，還會出席趙曾學韞的善學基金活動，出任善學大使幫助有需要的人，希望多做善事回饋社會。

文：音樂組