蔡少芬升cup晒葫蘆身形
月前誕下巨B的蔡少芬（Ada），坐完月養好身子即接job搵奶粉錢，昨日她打扮靚靚出席銀行活動，上圍「big」爆的她透露，早已為囡囡開設儲蓄戶口，並向藉詞唔畀利是的張家輝及吳啟華「追數」：「下年要佢哋畀double！」
5月誕下重磅B女張楚兒的Ada，昨日首次出席銀行活動，身穿貼身連身裙及高踭鞋示人的她，上圍明顯升cup不少，挑戰「甫士王」時仍相當靈活。
恨腰肢更幼
Ada坦言產後首度見傳媒心情緊張：「好開心，恨咗着五吋高踭同扮靚好耐。（收身成功？）滿意身形，某啲部位仲大咗添！好多朋友都問我係咪真係有生到？」目前餵母乳的她，並沒計算升cup多少，只希望腰肢更纖幼：「餵母乳好困身，所以推咗幾套劇，好可惜。」
問到有否掛念BB？Ada笑言因掛住背稿及扮靚，無暇理會寶貝女，對於「潮媽」陳慧琳曾揚言趁兒子睡着才搵銀，Ada笑說：「瞓得一兩粒鐘邊得？」並大讚老公張晉是湊B能手，故放心接job搵真銀。
呻坐月難頂
此外，談到老公早前勸她「洗頭」，Ada大呻坐月難頂：「坐月冇得洗頭沖涼，齋抹身，不過有冷氣同冇出街，所以唔臭！」已「捱過」坐月階段的她，現改為捱眼瞓：「就係咁先有葫蘆身形，哈！不過見到BB笑都好甜。」她又自爆女兒未出生時已開定戶口：「好多親友畀利是佢，得張家輝同吳啟華搵藉口唔畀，下年要佢哋畀double。」並笑言女兒日後可幫輕父母，自行交書簿費。
文：影視組