Jeana擺擂台邀死敵鬥波
寫真戰殺到埋身，今年有份出書的o靚模明知貿發局嚴禁在書展搞簽名會，索性自度奇招谷書。「翻版范冰冰」何佩瑜（Jeana）會在會展外擺下寫真擂台，廣邀陳靜（DaDa）、趙碩之等死敵帶埋寫真來切磋，爆發口水戰真人騷！
今年寫真戰將於本月20日爆發，有鑑於貿發局嚴禁o靚模在書展開簽名會，一眾出書o靚模索性置諸死地而後生，連入紙申請也不做，寧願身水身汗在書展外搞宣傳。
出書玩盡海陸空
對於貿發局的措施，寸人唔使本的Jeana有say，暗寸有關方面扼殺o靚模為寫真做宣傳，她說：「我都費事入紙申請，嗰度咁鬼逼人，又多多限制，我使靠佢哋咩？我會搵大啲地方做宣傳，玩盡海陸空，仲會比書展更加早出書！」
Jeana還表示會擺寫真擂台，廣發英雄帖邀請「百果園咪神」DaDa、趙碩之等o靚模開P打乒乓球，她說：「我搞呢個寫真擂台純粹係友誼第一，比賽第二，只係想同今年有份出寫真嘅女仔開Party，切磋一下。不過如果佢哋想比賽第一，友誼第二都冇所謂，我一樣奉陪。」而與Jeana同門的「濕身徐子淇」余曉彤（Hidy）亦表示沒有申請入書展，不過已四出打聽何方神聖會搞簽名會，實行帶埋自己本寫真去踩場，同場較勁。
趙碩之另覓場地
然而，其他有份出書的o靚模均已對書展死心，趙碩之說：「唔入紙申請喇，會展地方都唔夠，限制又多，我覺得大會配合唔到我囉，就算入到去都未必受到尊重，所以我會另搵地方搞簽名會。」而趙哲妤、許穎、黃榕、冬甩等亦異口同聲表示不會在書展搞簽名會，實行另闢場地做宣傳，谷書自救。
文：專案組