Jeana唧胸追殺病貓周秀娜
周秀娜前晚一副病容收起性感出席無綫節目，同場師妹何佩瑜（Jeana）以小背心唧胸上陣，完全將周秀娜揮低，看來陣上姊妹都冇情講，趁佢病攞佢命。
帶病出席無綫節目《變身男女Chok Chok Chok》的周秀娜明顯艷光銳減，她形容自己為「細菌人」，因為工作關係飛來飛去不支病倒，看醫生後指她發燒加感冒，所以成個人落晒形。
娜姐自爆畀女追
未知Jeana是否知道周秀娜收起性感，故以小背心拋胸上陣追擊師姐。問到周秀娜可有看過Jeana的寫真？她說：「只喺報紙上睇過，（Jeana追擊你？）哈哈……我哋好少機會接觸，反而跟另一師妹Hidy（余曉彤）friend啲。（佢都出寫真會買嚟睇？）我窮，只夠錢買一本寫真集！」
對於被指Jeana有威脅，周秀娜表示今年冇出寫真，所以唔怕比較。今年有不少內地女模在港出寫真，作為「神級」的周秀娜如何力敵呢？她笑說：「我都唔係神級！」
在節目中有環節要分辨男女，周秀娜自言冇難度，她說：「我都有一手架！我讀女校，都有好多男仔頭嘅靚女同學對我好好又送禮物，唔知係咪追我！」
至於在師姐面前攞晒彩的Jeana，前晚大方稱要送寫真集給周秀娜，談到她以性感及大膽床戲演出的電影《人約離婚後》，Jeana自爆當中與方力申一場床戲好激，之後小方要飲可樂解渴回氣：「可能我融化小方！（同陳柏宇都有床戲，邊個尷尬啲？）陳柏宇啦！因為冇清場！（擔心被定型性感？）唔怕！我寫真集都性感，首尾呼應啫。」
伍詠薇high到反眼
主持之一的伍詠薇於前晚（7月1日）正好是與練海棠結婚十二周年，練海棠更現身慶祝，監製錢國偉和好友陳敏之、胡杏兒等紛紛送上驚喜，於廠內切蛋糕和安排前香港先生以裸男造型「招呼」伍姑娘包圍跳舞，伍姑娘high爆反白眼大叫：「Yes！Yes！」同場阮兆祥還取笑全晚不停咀嘴的練氏伉儷：「觀眾如果唔想有糖尿病就唔好望啦！」
文：影視組